الرئيسية > آراء > كانسمع بزاف على “انهيار منظومة القيم ” “الانهيار الاخلاقي” “ازمة القيم” كايدويو على المغرب فحالا كان فواحد النيفو عالي د الاخلاق و الحقيقة انه اصلا ماعمر ماكانت عندنا منظومة قيم و اخلاق عالية باش تنهار ! خاصنا نبنيوها فالمدرسة و الزنقة و الشارع عاد نقدرو نبكيو عليها لامشات
07/01/2021 15:00 آراء

كانسمع بزاف على “انهيار منظومة القيم ” “الانهيار الاخلاقي” “ازمة القيم” كايدويو على المغرب فحالا كان فواحد النيفو عالي د الاخلاق و الحقيقة انه اصلا ماعمر ماكانت عندنا منظومة قيم و اخلاق عالية باش تنهار ! خاصنا نبنيوها فالمدرسة و الزنقة و الشارع عاد نقدرو نبكيو عليها لامشات

كانسمع بزاف على “انهيار منظومة القيم ” “الانهيار الاخلاقي” “ازمة القيم” كايدويو على المغرب فحالا كان فواحد النيفو عالي د الاخلاق و الحقيقة انه اصلا ماعمر ماكانت عندنا منظومة قيم و اخلاق عالية باش تنهار ! خاصنا نبنيوها فالمدرسة و الزنقة و الشارع عاد نقدرو نبكيو عليها لامشات

سهام البارودي – كود//

قبايلة فالفوروج فبلاصة مافيهاش البوليسي واقفة كانساين يدوز للخضر و هوا يبان ليا جوج طاكسيات بويض دازو من حدايا ! حرگو الضو ودازو ! وسط الشتا و الغيس و قلة الشوف بنادم حارگ الضو الاحمر و سايگ بعباد الله و بقيت كانفكر مع راسي قلت دابا مول الطاكسي لاوقفتيه و سولتيه علاش حرگ الضو غايقوليك ” واش انا غانبقا نساين تايدوز للخضر !؟ نضيع الوقت انا ؟! نوقف هنا و نوقف لهيه و نوقف لهيه ! فوقاش غانخدم ؟!”
هادي هي العقلية ديال مالين الطاكسيات لي كايحرگو الضو ! و هادي هي العقلية ديال بزاف د المغاربة ! المغربي باغي يصوفي راسو و يربح الفلوس و الوقت باش ؟ بالقوالب! اوريلي المعقول!
هادشي خلاني نفكر فواحد الجملة كانسمعها بزاف ” انهيار منظومة القيم في المجتمع المغربي ” شحال و هي كاتعاود فراسي و لقيت راسي كانفكر فيها و كانسول راسي ” آجي ياه ؟!تا فين عمر كانت عندنا شي منظومة قيم اخلاقية حضارية على حقها و طريقها اصلا باش نقولو عليها بلي انهارت ؟”
و فاش كاندوي على المنظومة الاخلاقية كانقصد بيها الحضارة و الرقي فالتعامل : النقا فالزناقي، نبذ العنف فالعلاقات بين الناس، اللباقة فالهضرة بين الناس، احترام المرأة، احترام الطفل…
ديك ” المنظومة الاخلاقية” لي غاتخليك لاطاح ليك البزطام وسط الشارع فالمانيا يكون عندك احتمال كبير انه لي شافو طاح ليك يجري يهزو و يرضو ليك ! و لامشات ليك شي باليزة فالتران فالسويد ترجع و تلقاها فالحفظ و الصون ! وا حنا كارطونة فيها جثة ( حسب التعاويد د الخراز) و بنادم طمع فيها و بغا يديها كونما لقا فيها الكسدة دبنادم مايعيطش للبوليس و كادوي ليا على المنظومة الاخلاقية آ ولد عمي!
 رجعت بالتفكير ديالي لسنوات الطفولة و للتعاويد ديال الواليدين و الجدود ! فكرت فالاحداث التاريخية لي دازت فالمغرب و لي قريت عليها و خرجت بخلاصة انه اصلا اصلا ماعمر كانت عندنا منظومة اخلاقية حضارية ! ماعمر كنا نقيين ماكانلوحوش الزبل فالزنقة مثلا ! ماعمر ماكنا كشعب شعب متحضر كايناقش مشاكلو بهدوء ! ماعمر كنا كانحتارمو بعضياتنا ! كانحتارمو المرا ! كانحتارمو الطفل ! كانتعاملو مزيان مع الخدامة لي كانجيبوهم يعاونونا و حتى فاش كايكون هادشي كايكون على مستوى فردي و صافي! حتى مفهوم ” الاحترام” و “التربية” بالنسبة للناس لي كايشوفو انهم كانو فالمجتمع و مابقاوش كاتلقاهم مفاهيم مرتابطة اكثر بالخوف و العنف اكثر من الاحترام و التربية !
كايجي واحد راسو مربع كايتأسف ” لا الصراحة شحال هادي التلاميذ كانو كايحتارمو الموعليم” مثلا!  ايه معلوم يحتارموه شحال هادي التلاميذ كانو كايبولو فسراولهم من المعلم و المدير و البوليسي و الفقيه حيت لي شدك يقدر يخلي دار بوك و يسيفطك عند واليديك يكملو عليك ! علاه المروكي شحال هادي كان قادر يتنفنف ؟!  وواش هذا هوا الاحترام ؟ واش هادي هي منظومة القيم مبنية بالعنف و الخوف و نتا قتل وانا ندفن!! هادي هي الاخلاق لي كانسولو عليها فين مشات ؟! واش هي عمرها كانت بعدا ؟!
المدافعة فالطوبيسات و شي كايعفط على شي ! عدم احترام الصف فالادارات العمومية ! كول و وكل ! قسم ردم ! من نقل انتقل و من اعتمد على نفسه بقي في قسمه ! حگر المرا ! حگر الدري الصغير ! الله يجيب الغفلة بين البايع و الشاري ! لي ماعندو سيدو عندو لالاه ! مانهضروش على العنصرية المقيتة لي كانت ساكنة بين المغاربة و بالعكس نقصات الحدة ديالها فالسنوات الاخيرة ! علاش شكون طالق على الشلوح بلي سقرامة ؟ ماشي المغاربة خوتهم ؟ و العروبية مكلخين و جبالة غدارة و فواسة كدا و كدا …
واش عمر كان المجتمع المغربي مجتمع متحضر فيه ناس كايتمتعو باخلاق عالية و كايسود وسط منهم الاحترام ؟! واش عمرنا كنا شعب نقي كايدوش كل نهار و كاتشم فيه ريحة الشامبوان و الجيل دوش من بعيد ؟! شعب كايحك سنانو بانتظام ؟! واش عمرنا كنا ماكانلوحوش الزبل فالزنقة وواش عمر الرجال كانو ماكايبولوش فالزنقة ؟! و يتنخمو فالزنقة و يحكو تراميهم و قلاويهم فالزنقة ؟!
واش كانت هاد المنظومة الاخلاقية لي كاتبكيو عليها ؟ شافها شي حد قبل ماتنهار ؟! و اذا كانت فعلا علاش لي كانو مآمنين بيها ماورثوهاش للاجيال لي جات موراهم ؟!
الحقيقة هي انه ماعمر ماكانت عندها منظومة اخلاقية نقدرو نتأسفو عليها ! و انه عوض مانگلسو نبكيو و نتأسفو على شي حاجة ماعمرها كانت ! خاصها نبنيو ديك المنظومة فالمدرسة و الاسرة و الشارع … المغربي محتاج يقرا le civisme و يتعاقب الى ماخضعش ليه ! ع الله و عسى نجحوا في بناء منظومة اخلاقية ….

موضوعات أخرى

26/01/2021 23:00

فأول ترشيح للمغرب لهاد الهيئة الرياضية.. لقجع جاب مصادقة فيفا على ترشيحو لعضوية مجلس الاتحاد فالوقت لي ترفض ملف رئيس الاتحاد الجزائري للكرة