وكالات//

قالت هيئة تنظيم الطيران فالهند البارح الاثنين، باللي طيّارة ديال الخطوط الجوية الهندية (إير إنديا) من نوع بوينغ 777 تضطرات ترجع من الرحلة ديالها بعدما الطيارين حبسو واحد المحرك بسبب هبوط فضغط الزيت، حسب وكالة رويترز.

ووضحات المديرية العامة للطيران المدني فبلاغ ليها باللي الطيّارة، اللي كانت غادية لمومباي العاصمة المالية ديال الهند، هبطات بسلام فنيودلهي، وغادي يتفتح تحقيق فهاد الحادث.

وتذكر باللي الطيارات الحديثة مصمّمين باش يقدرو يطيّرو ويهبطو بأمان حتى إلا كان خدام غير محرك واحد إلى تطلب الأمر.

وخضعات شركة الطيران الهندية هاد العام لتدقيق ومراقبة مشددة، من بعد حادث تحطم طيّارة بوينغ دريملاينر نهار 12 يونيو، اللي مات فيه 260 واحد.

وسجلات المديرية العامة للطيران المدني بزاف ديال الثغرات الأمنية فالشركة، اللي كانت مملوكة للحكومة حتى لعام 2022.

وقالت وكالة رويترز فواحد التقرير سابق هاد الشهر، باللي تحقيق دارتو الشركة على سبب قيام شي طيارات ديالها برحلات تجارية بلا ترخيص ديال الصلاحية للطيران، كشف على “إخفاقات ممنهجة”.

واعترفات الشركة باللي خاصها تحسّن الأداء ديالها، خصوصًا فمسألة احترام القوانين والمعايير.