وكالات//

عاشو ركاب طيارة كانت فواحد الرحلة داخلية فإيران مع الصباح ديال الأحد لحظات ديال الرعب دبصح.

هادشي وقع منين الطيارة اللي تابعة لشركة “تشابهار” تعرضات لعطب مفاجئ فواحد من المحركات ديالها، وهذا خلا لبيلوط يهبط بيها هبوط اضطراري، وهادشي نقذ حياة العشرات. الطيارة كانت غادية من طهران العاصمة حتى لمطار مدينة مشهد اللي فالشرق الشمالي ديال البلاد.

وعلى حساب ما قالتو بعض وسائل الإعلام المحلية، المشكل وقع تقريباً عشر دقايق من بعد ما قلعات الطيارة مع 6:30 ديال الصباح، منين وقف واحد من المحركات على الخدمة، وهادشي خلا الطيارة تهبط بطريقة حادة وخطيرة نحو الأرض، وولات قريبة بزاف من واحد المنطقة جبلية.