وكالات//

فواحد الواقعة اللي كانت غاتكون كارثة جوية، سلطات الطيران المدني فإسبانيا كشفات على حادث خطير وقع فـ فبراير ديال العام اللي فات، ملي حلقات طيارة فيها 199 راكب بلا حتى شي طيّار فقمرة القيادة لمدة ديال عشر دقايق.

حسب تقرير رسمي خرج مؤخراً، الرحلة كانت طالعة من فرانكفورت فـ ألمانيا ومتوجهة لمدينة إشبيلية فـ إسبانيا، وكانت بطيارة من نوع “إيرباص A321” تابعة لشركة لوفتهانزا، وكيشغلها طاقم فيه 6 أفراد.

المشكل بدا ملي خرج القبطان اللي عندو 43 عام من قمرة القيادة باش يمشي للمرحاض، وخلا المساعد بوحدو، حيث كان كيتصور أن حالتو الصحية مزيانة. ولكن المساعد، اللي عندو 38 عام، طاح فغيبوبة مباشرة من بعد ما بقى بوحدو فالكابينة.

القبطان حاول يرجع بسرعة واستعمل جهاز الاتصال الداخلي ولكن ما جاوبو حتى حد، وهنا اضطر يستعمل الرمز الأمني باش يفتح الباب، ولكن ما خدمش في الوقت المناسب. وبالصدفة، قبل ما الباب يتحلّ آلياً، فاق المساعد وفتح الباب بيديه.

فالتقرير، قالو أن مساعد الطيّار كان باين عليه الشحوب، كيتعرق، ومشوّش، وهنا تدخل الطاقم الطبي بمساعدة طبيب كان من بين الركاب، وقال أن السبب ممكن يكون عندو علاقة بمشكل فالقلب.

وأشار المساعد من بعد إلى أنّه ما عقل على والو من داكشي للي وقع، باستثناء أنّه كان كيحلق فوق مدينة سرقسطة قبل ما يفيق ولقى راسة كيتلقى العلاج.