كود الرباط//
علمت “گود” من مصدر مطلع، أن الحروب السياسية داخل مجلس مدينة الرباط، بين العمدة وباقي الأطراف، كادت أن تسبب في أزمة مع دولة الصين.
وحسب معطيات “گود” القصة بدات فاش مجلس عمالة الرباط قرر يدير الاحتفال باليوم الوطني للصين بحضور السفير الصيني ودبلوماسيين، فقاعة دار البريني لي تابعة لمجلس البلدية، هنا كولشي عادي حتى لواحد الوقت بغات العمدة تمنع مجلس العمالة من هاد القاعة بسبب حروبها ضد رئيس مجلس العمالة ورئيس مقاطعة حسان.
العمدة مبغاتش تخلي مالين الإنارة والمكلفين بتجهيز القاعة المخصصة للاحتفال يدخلو، وهادشي نوض الصداع هاد السبت الفايت.
وحسب مصدر “گود” تدخلت الولاية باش تفك المشكل وتخلي القاعة مفتوحة باش يتنظم فيها هاد النشاط. هنا سالا الكلام. هادشي كامل وقع حيثاش عبد العزيز الدرويش رئيس مجلس العمالة لم يوجه الدعوة إلى أسماء اغلالو عمدة الرباط باش تحضر، فسياق العزلة لي كتعيشها اغلالو وسط العاصمة. لا منتخبين كيهضرو معها وينسقو معها ولا الولاية كتسوق ليها.
القضية تطورت كثر، بحيث اليوم طالب أعضاء مجلس جماعة الرباط باش تكون توصية فتقرير اللجنة المكلفة بالأنشطة الاجتماعية والرياضية والثقافية تدين تصرفات العمدة اغلالو، واستغربو علاش هاد اللجنة مدارتش التوصية كما هو متفق عليه في اجتماع اللجنة الثلاثاء الماضي.
يشار بلي اليوم كانت دورة مجلس المدينة، والعمدة غايبة بسبب تواجدها خارج المغرب. الدورة ديال اليوم غايدوز فيها الدعم اللي مخصصو المجلس لتنظيم المونديال.
