كود الرباط//

الوزيرة عواطف حيار، للي فشلت فتدبير قطاع الأسرة والتضامن والمساواة وكل ما له علاقة بهاد القطاع الحي، وللي غائبة تماما فنقاش مدونة الأسرة، من غير الصوت المحافظ جدا والبلوكاج لي دارت فجلسات مناقشة مدونة الأسرة، بسباب الأفكار اللي كتبغي تناقش بطريقة “محافظة” كثر من الإسلاميين، اليوم هاد الوزيرة تالفة معارفاش شنو دير خصوصا مع الهضرة الكثيرة لي دايرا على التعديل الحكومي المرتقب.

الوزيرة حيار هاد الأيام لاصقا فالأمين العام لحزب الاستقلال نزار بركة، فينما مشا كتمشي معه، وديما فجنبو لأنه كتعتبرو “الوصي عليها” وهو لي جابها واخا حتى حد مكيعرفها وسط الاستقلال.

حيار لي كانت دائما محط انتقادات أطر وزارة الأسرة، أولا بسبب تهميشها لأطر الوزارة ودخولها فصراعات جانبية خلات عدد من الأطر مبقاوش باغين يخدمو معها، بدءا بوكالة التنمية الاجتماعية مرورا بتدبير وضعية الإعاقة ثم الأسرة وأخيرا الطفولة. فشل ذريع فتدبير هاد القطاعات.

بل أكثر من ذلك حتى الخطة الوطنية للمساواة تعثرت، لسبب بسيط، حسب مصادر “كود”، ميمكنش وزيرة محافظة بزاف تكون كتفهم فالمساواة. حتى أن بعض الأطر كيقولو اسوأ وزيرة دازت فهاد المنصب هي حيار.