وكالات//

ماتت واحد المرا فحادث خطير فولاية فلوريدا فمريكان من بعدما هجم عليها تمساح فبحيرة كيسيمي اللي كاينة جنوب مدينة أورلاندو.

الواقعة وقعات نهار الثلاثاء فالعشية، وهادشي حسب ما قالت هيئة الحفاظ على الحوت والحياة البرية فلوريدا، اللي خرجات بلاغ وقالت فيه باللي المرا كانت فزورق مع واحد الشخص، وتصادفات مع التمساح.

وحسب السلطات، المرا طاحت فالماء من بعد المواجهة مع التمساح، اللي هاجمها مباشرة. ورغم المحاولات ديال الإنقاذ، بقاو غير يخرجو الجثة ديالها من البحيرة، وأعلنوا وفاتها فبلاصة الحادث.