وكالات//

فواحد الحادثة خايبة هزّات المكسيك، توفات المؤثرة فاليريا ماركيز اللي عندها 23 عام، فصالونها ديال الجمال “Blossom – The Beauty Lounge” اللي كاين فولاية خاليسكو فالجهة الغربية ديال المكسيك، وهادشي كان مباشرة فواحد اللايف كانت دايراه مع المتابعين ديالها فالسوشيال ميديا.

فالفيديو، بانت فرحانة وكاتضحك وكتشوف من الشرجم، حتى جاتها رصاصة فصدرها، ومن بعد جوج رصاصات فالرأس.

فآخر لحظات، باينة وهي كتحط يدها على الجرح، ومن بعد طاحت متأثرة بالإصابة ديالها، وفهاد اللحظة، ظهرت شي مرا ما معروفاش فالفيديو وسدات اللايف.

وحسب وكالة “إنفوباي”، دخل شي واحد مسلح للصالون وضرب فاليريا بالقرطاس، ومن بعد هرب فوق موطور. وصلت لامبيلونس بسرعة، ولكن توفات فبلاصتها، والسلطات قررات تدير التشريح باش يعرفو السبب الدقيق ديال الوفاة.

البوليس ديال المكسيك طوقو البلاصة وبداو كيقلبو على المجرم، ولكن مزال ما علنوش على شكون هو ولا علاش دار هاد الجريمة.

وكانت فاليريا ماركيز معروفة فتيك توك، وكانو كايتابعوها أكثر من 110 ألف متابع، وكانت كتدير محتوى على الجمال وستيل الحياة. وفبيان من مكتب النائب العام، التحقيقات الأولية بينات أن المجرم دخل مباشرة للصالون وبدى كيضرب، ومن بعد هرب.