كود ـ الجديدة//

واحد الراجل من مدينة الصويرة مات ليلة الخميس، فكسيدة خايبة وقعات حوالي تسعود ديال الليل ف الطريق اللي كا تربط بين أزمور ومصور راسو.

الكسيدة وقعات بعدما سائق كاميو خرج على الرواق ديالو، ودخل فالاتجاه المعاكس، وطلع فوق سيارة بيكوب كانت كتحمل رؤوس ديال الغنم، مما تسبب فسحق البيكوب ووفاة السائق ديالها فالحين.

مصادر من عين المكان قالت إن الشيفور ديال الكاميو هو اللي دخل ف البيكوب مباشرة، ودخَلها تحت الهيكل الحديدي ديال الكاميو، الأمر اللي صعّب بزاف على الوقاية المدنية والجدارمية إخراج الجثة من وسط الحطام.

الشهود اللي حضرو الحادث قالو إن مكان الكسيدة كان مظلم بزاف ومافيهش إنارة كافية، بحيث ماكانش بروجيكتور ينوّر المقطع الطرقي ولا ينبه السائقين اللي جايين باش يخففو السرعة، وهادشي كان ممكن يسبب فكسيدة أخرى.

هاد الواقعة المأساوية كتزيد تطرح تساؤلات على غياب شروط السلامة فالطرق الجهوية اللي كتولي مسرح لحوادث خطيرة كل مرة.