كود -وكالات//
الموجة الجديدة د الفن المستدام (Eco-Art) وعلاقة الإنسان بالطبيعة اللي نايضة عليها الهضرة بزاف هاد الأيام كتخلينا نتفكرو واحد الفنان فرانساوي هارب ليه، مني دار تجربة فنية فباريس ،وقدر يفقص بيض د الدجاج غير بالسخونية والحرارة ديالو وسط واحد متحف معروف.
هاد الفنان سميتو أبراهام بوينشفال، ومعروف ف العالم كلو بالعروض الحية الانتحارية ديالو، هاد المرة، جاب 10 د البيضات ملقحين، وبنا بيضة عملاقة شفافة من الزاج وسط متحف “بالي دو طوكيو” ودخل سد على راسو وسط منها لمدة 21 يوم كاملة بلا ما يخرج، باش يلعب الدور ديال “الدجاجة البشرية” .
بوانشفال ما جلسش فوق البيض نيشان حيت كون دارها كون تفركعو من الدقة الأولى، ولكن دار خطة ذكية، حط البيض ف صندوق خاص تحت واحد الناموسية كينعس فوق منها، وكان كيتغطى بواحد المانطا خاصة كتحبس السخونية وتوصلها للبيض بلا ما يتهرس.
وباش يضمن بلي الحرارة د جسمو تطلع لـ 37 درجة كان كياكل كميات كبيرة د سكينجبير والأعشوب الحارة، السيد كان كيدوز 23 ساعة ونص ف النهار وسط الزاج وما عندو الحق يخرج غير 30 دقيقة فقط ف 24 ساعة باش ياكل ولا يخرج للمرحاض.
ف اللخر د السيمانة الثالثة، بدات المعجزة تلوح وتفركعات البيضة الأولى وخرج منها كيتكوتف المجموع، تفقصوا ليه 9 د الكتاكيت من أصل 10 ،هاد الكتاكيت عاشوا معاه تلات أيام وسط ديك البيضة د الزجاج، ومن بعد صيفطوهم يعيشوا بسلام ف واحد الفيرمة ف منطقة النورماندي هادي عشر سنين.
