الرئيسية > آراء > كافر مغربي فحوار مع “كود”: ها علاش اختاريت ننشر مذكراتي ف”كود” وما عمري خفت على راسي ومستعد نبان فأي وقت
08/03/2019 10:01 آراء

كافر مغربي فحوار مع “كود”: ها علاش اختاريت ننشر مذكراتي ف”كود” وما عمري خفت على راسي ومستعد نبان فأي وقت

كافر مغربي فحوار مع “كود”: ها علاش اختاريت ننشر مذكراتي ف”كود” وما عمري خفت على راسي ومستعد نبان فأي وقت

كود كازا ////

السؤال الاول
“كود”: في مذكراتك “كافر مغربي” اختاريتي كلمة “كافر” علاش هاد العبارة بالضبط. علاش ماشي مرتد ماشي “ملحد”. هاد العبارة عندها حمولة دينية كبيرة؟

كافر مغربي هو اللقب للي تعرفت بيه وبسبب ديك الحمولة الدينية الكبيرة علاش ختاريتو. الهدف على المدى المتوسط هو إثارة الانتباه لهاد المصطلح اللاإنساني وعلى المدى البعيد هو التطبيع مع المخالف.

السؤال الثاني
“كود”: فمسارك٬ خاصة فالطفولة اللي كان فيها العنف بزاف ما كانش حاضر الدين تقريبا. فالمانيا اكتشفنا انك كنتي من العدل والاحسان. واش المحرك للتطرف كان هاديك الطفولة

الدين كان حاضر فالطفولة ولكن ماشي بنفس الحدة للي كان عليها فألمانيا. لا أقبل كلمة تطرف لأن الإسلام دين واحد والنصوص اللي تايخدموا بيها للي تايتسماو متطرفين هي نفسها للي عند كاع المسلمين. الفرق هو أن الأغلبية ديالهم ختارت تعطيلها.

السؤال الثالث:
“كود”: خاص القارئ يتسنى حتى لاخر الفصول تقريبا عاد يكتاشف هاداك التحول اللي وقع ليك حتى ما بقيتيش مسلم. انت كتحكي هاداك المسار الطويل باش ما تبقاش مسلم. اللي غايب هو كيفاش تصرف معاك المحيط الصغير ديالك. العائلة ثم هادوك اللي كنتي معاهم فالجامع؟

ماشي ساهل أنك تقاوم التلقين الديني للي تربيتي عليه. كاين بزاف ديال المؤثرات، وهاد المؤثرات تاتبدا من الطفولة لذلك ما يمكنش نتكلم على الفترة القصيرة قبيل التحول ونهمل الباقي.
فيما يخص العائلة والأصدقاء أغلبهم ما عندهم تا علم بالتحول ديالي واللي عارفين ساكتين هاد الساعة واخا أنا عارف أنهم ما تايعجبهمش شنو تاندير. نتمنى يجي النهار للي ترجع الأمور عادية والاختلاف لا يفسد للود قضية.

السؤال الرابع:
“كود”: اختاريتي ما تبانش واش خايف على راسك؟
أنا ما عمري خفت على راسي ومستعد نبان فأي وقت، رغم أنني ما تانعتابرش الظهور ديالي مهم لهاد الدرجة. المشكل هو أن بعض الناس للي قراب ليا غا يتآذاو يلا درتها. فعدم ظهوري هو فقط لهذا السبب. يلا تغيرات الأمور مستقبلا غا نبان إذا دعا الأمر لذلك.

السؤال الخامس:
“كود”: علاش قبلتي تخرج مذكراتك اللي خرجات فكتاب وكانت ناجحة فحلقات ف”كود”؟
الهدف الأسمى من مذكراتي هو التطبيع. خروجها ف “كود” غا يعطي فرصة للناس أنهم يتعرفوا على قبسات من حياة مغربي بحالهم ختار أنه ما يبقاش مسلم.

موضوعات أخرى