كود سبور//

قدر منتخب فرنسا وصيف بطل العالم، يبدا مزيان كاس أوروبا، برباح مهم على النمسا فأول ماتش له فالمسابقة، برسم الجولة الاولى من دور المجموعات.

ونجح المنتخب الفرنسي فأنه يخرج رابح فالماتش ضد النمسا بنتيجة واحد لزيرو، واخا الماتش ما كانش ساهل للفرنسيين والنجوم ديالهم ما قدموش النيفو المنتظر منهم وأولهم كيليان مبابي، اللي ضيع فرص سهلة وفاص أفاص مع الشبكة ديال النمسا، والهدف ديال الفرنسيين ماركاه المدافع النمساوي ماكسيميليان ووبر فالدقيقة 38، ملي لمس التمريرة ديال مبابي ورسلها للشبكة ديال النمسا، وبقات النتيجة كما هي عليه حتى سالا الماتش، مع العلم ان كيليان مبابي تعرض لاصابة فالأنف ديالو ملي قرب اللقاء يسالي ورعف وخرج ما كملش الماتش.

وبهذا الرباح قدرو فرنسا ياخدو 3 نقاط مهمة بداو بها كاس اوروبا، ومتساويين فعدد النقاط مع المنتخب الهولندي اللي كان ربح منتخب بولندا عن نفس الجولة بـ2 لواحد، والمنتخبان الفرنسي والهولندي كيتصدر دابا الگروب الرابع، أما النمسا وبولندا عندهم 0 نقطة.