كود -وكالات //

وسط الگيرا بين أمريكا وإيران وإسرائيل، خرجات تحذيرات من البيت الأبيض للموظفين باش ما يشاركو حتى فنوع من التقمار مرتبطة بالسياسة ديال مريكان ،  فـرسالة داخلية  سرية ترسلات فـ 24 مارس حسب تسريبات صحفية ، تم التنبيه موظفين البيت الأبيض  بلي استغلال المعلومات السرية أو المناصب الرسمية باش يربحو فلوس من الأسواق المالية راه أمر مرفوض وخطير.

هاد التحذير جا من بعد ما تبين أن شي متداولين راهنو بمبالغ كبيرة قبل قرارات مهمة، بحال تأجيل ضربات عسكرية ضد إيران ،وفعلاً شي عمليات وصلات حتى لـ 500 مليون دولار فـ وقت قصير، وهاد الشي خلا الشكوك دور على احتمال تسريب معلومات حساسة قبل الإعلان الرسمي. ومن بعد القرار هبطات اتمنة النفط بنسبة مهمة الشي اللي زاد عزز هاد الفرضيات مني ربحو شي مجهولين فلوس كبيرة كانو قمرين على نزول أثمنة البترول  .

عدد من السياسيين فـالكونغرس عبرو على القلق ديالهم، واعتبرو أن هاد النوع من التقمار كايحول الحروب بحال شي كازينو، وكيشجع على تسريب معلومات ديال الأمن القومي، كيف ما أنا  بعضهم عطا مقترحات قوانين باش يتمنع هاد النوع من الأسواق المرتبطة بالحروب.

فالمقابل، خبراء فالأمن حذرو من أن هاد المنصات ممكن تستغلها جهات معادية باش تأثر على القرارات أو تربح من معلومات داخلية.