أميمة عطية – كود كازا ///
رخص البني والإصلاح ولات من الملفات اللي كتطرح علامات استفهام على مستوى عدد من مقاطعات فكازا ، بعدما طوالت مدة انتظار المواطنين لي باغيين يسويو وضعية طلباتهم وياخدو التراخيص باش يبداو أشغال لبني أو يصلحو الديور ديالهم ويصاوبو لواجهات .
هاد التأخر حرك عدد من المنتخبين والمسؤولين لي يلاه فاقو من نعاس، و بداو من الداخل باش يعرفو أسباب لبلوكاج ويلقاو حلول باش يسرعو الاصلاحات.
وحسب لمعلومات لمتوفرة ، عرفات عدد من المقاطعات اجتماعات وتنسيقات بين مسؤولين محليين وأطر المصالح التقنية والإدارية، الهدف منها هو تقييم وضعية طلبات رخص البني والإصلاح اللي مازال ما تحسمش فيها، وتحديد الإكراهات اللي كتعرقل خروجها داخل آجال معقولة.
ووفق المعطيات نفسها، هاد التحركات كتستهدف بالخصوص الملفات المرتبطة بإصلاح وترميم البنايات، مع إعطاء الأولوية للطلبات اللي مستوفية للشروط القانونية والتقنية.
ومن بين المناطق اللي دخلات فهاد الإجراءات ، كاينة مقاطعة الحي المحمدي، اللي كاين توجه فيها لتسريع معالجة طلبات رخص الإصلاح بعدد من الأحياء، من بينها درب مولاي الشريف وبلوك رياض ودرب السعد، يحيت كاينين بزاف الديور والبنايات محتاجة لأشغال الصيانة والترميم، وصحابها محتاجين التراخيص باش يقدرو يباشرو الأشغال بشكل قانوني.