أميمة عطية – كود كازا ///

شعلات العافية فالساعات الأولى لبارح الاثنين فسوق المسيرة بمنطقة حي الفلاح فالدار البيضاء، وخلفت خسائر مادية كبيرة وصلات عدد من المحلات التجارية.

وحسب المعطيات الأولية المتوفرة، لعافية وصلات 30 حانوت داخل السوق، وسط تدخل عناصر الوقاية المدنية اللي حاصرو العافية وباشرو عمليات الإخماد باش يمنعوها تنتاشر لباقي المحلات والمحيط ديال السوق.

وحسب لمعلطيات لمتوفرة ، الحريق استنفر ، السلطات المعنية اللي انتقلت لعين المكان، فحين تصاعد دخان كثيف من السوق، الشي اللي خلق حالة من الهلع وسط سكان المنطقة.

ووفق نفس لمصدر، ما تسجلات حتى إصابات بشرية، فيما الخسائر المادية مازال ما تحدداتش بشكل نهائي، خصوصا أن عمليات معاينة الأضرار مازال متواصلة.

أما أسباب اندلاع العافية، فمازال مجهولة لحدود الساعة، فانتظار ما تسفر عليه المعاينات والأبحاث اللي من شأنها تكشف ظروف وملابسات هاد الحريق.

وللإشارة فقط، هاد سوق المسيرة سبق ليه عرف حريق كبير فـ يونيو 2025، واللي شعلات فديك لوقت ف 50 محل عشوائي.