كود كازا//

“دخول الحمام ماشي بحال خروجو” ما بقات غير مثل شعبي، ولات حتى قاعدة كيتطبق بها القضاء. هاد الشي وقع فواحد الملف حديث قدام المحكمة المدنية فالدار البيضاء، فين رجل دخل لحمام تقليدي باش يستحم، ولكن خرج بقضية وتعويض ديال 14 مليون سنتيم، حسب القرار اللي نشرة أحد المحامين.

حسب معطيات الملف، الرجل تزلق داخل الحمام وطاح، وتعرّض لإصابة خطيرة. من بعد الحادث، مشى قدم مقال للمحكمة المدنية وطلب تعويض عن الضرر اللي لحقو بسبب السقوط داخل فضاء مفروض يكون آمن للزبناء.

شركة التأمين دافعات على راسها وقالت باللي الضحية هو اللي تزلق من تلقاء نفسو، وما كاين حتى تقصير ولا مسؤولية على صاحب الحمام.

المحكمة الابتدائية، ومن بعد ما دارت خبرة تقنية، ما اقتانعاتش بهاد الدفع، وحكمت بتاريخ 22 يوليوز 2025 لفائدة المتضرر بتعويض وصل لـ140 ألف درهم، أي 14 مليون سنتيم.

تعليل الحكم كان واضح: صاحب الحمام ملزم قانونيا يوفر العناية والظروف الملائمة باش المستحمين يستعملو الحمام بشكل عادي وآمن، وخصو يحافظ على أرضية الحمام نقية وما فيهاش بقايا ديال مواد كتسهل الانزلاق والسقوط.

وهكذا، القضاء طبق حرفيا القاعدة الشعبية “دخول الحمام ماشي بحال خروجو”: دخل بـ15 درهم ديال تسعيرة الحمام، وخرج بحكم قضائي ديال 14 مليون سنتيم، والدرس واضح… السلامة مسؤولية وماشي اختيار.