كود كازا ///

كتستعد جهة الدار البيضاء سطات باش تحتاضن الدورة الرابعة ديال المهرجان الوطني للفنون التشكيلية، وذلك ما بين 13 و15 أبريل 2026، فالمركز الجهوي لمهن التربية والتكوين بدرب غلف.

وحسب معطيات جاية من الأكاديمية الجهوية للتربية والتكوين، هاد التظاهرة الثقافية غادي تتنظم تحت شعار: «إفريقيا… ألوان وجذور»، وهاد الشي فإطار تشجيع الإبداع الفني وتعزيز الانفتاح الثقافي وسط الوسط التربوي.

الهدف من هاد المهرجان هو إبراز مواهب الشباب فمجال الفنون التشكيلية، وتقوية حضور التربية الفنية فالمؤسسات التعليمية، مع خلق فضاءات للتبادل والتفاعل بين التلاميذ والفنانين والمهتمين.

ومن المرتقب يتنظم برنامج فيه معارض وورشات وأنشطة موازية، مع دعوة وسائل الإعلام لمواكبة هاد الحدث الثقافي اللي عندو بعد تربوي وفني مهم.

والافتتاح الرسمي غادي يكون يوم الثلاثاء 14 أبريل 2026 على الساعة الرابعة بعد الزوال .