كود سبور//

أكد كارلوس كاريدو مدرب الوداد الرياضي أن اللاعبين قدمو مستوى جيد في ماتش الفريق ضد شبيبة القبائل الجزائري يوم السبت 1 أبريل بستاد دونور، برسم الدورة الأخيرة من ليكروب د عصبة أبطال إفريقيا والمهم هو التأهل إلى ربع النهائي متصدرين الكروب الأول.

وتحدث كاريدو في تصريح له من بعد الماتش ضد شبيبة القبائل واللي ربحوه الوداد بنتيجة 3 لزيرو وقال: “راه النتيجة كتبين النيفو ديال اللاعبين، والهدف ديالنا كان هو التأهل إلى ربع النهائي وحنا متصدرين لكروب وحققناه، فرحان بالرباح وغنستافدو من هاد المباراة بالإيجابيات والسلبيات ديالها ونطورو ريوسنا”.

وقدم الوداد الرياضي ماتش كبير ضد شبيبة القبائل الجزائري وربح بنتيجة 3 لزيرو في أمسية رمضانية ممتعة للجماهير الودادية، واللي جات حضرات بأعداد كبيرة باش تشجع وتساند الفريق والمجهود ديالها لم يضع ورجعت فرحانة بالرباح.