احمد الطيب كود الرباط//

تعرض الزميل “ي.ذ” الصحفي بجريدة شوف تيفي، لتعامل سيء وغبي في نفس الوقت من مستشارة وزيرة الانتقال الطاقي والتنمية المستدامة.

المستشارة اللي هي استقلالية اصلا وسميتها لطيفة العمراني، خدامة عند وزيرة بامية، تهجمت على صحفي شوف تيفي وما خلات ما قالت فيه، وزادت ليه تهمة “الاعتداء عليها”.

هادشي وقع فاش جوج زملاء “كود” و”شوف تيفي” كيسولو وزيرة الانتقال الطاقي على الخبار لي خرجات الصحافة البريطانية والاسترالية على الوزيرة بنعلي بخصوص علاقتها مع الملياردير الاسترالي فورس والصورة ديال البويسة لي تنشرات.

هاد الاستقلالية للي معرفناش واش مستشارة ولا “كاردكور” الوزيرة، قالت بغات “تربي” الزميل الصحفي لي طبعا كولشي كيعرفو فالرباط باخلاقو ومهنيتو.
ماشي غير هادشي، بل قالت بلي غاتمنعو كاع يدخل لمجلس النواب، هادي صافي ولات تتحكم فسي الطالبي العلمي وعندها سوارت مجلس النواب. اللي خصو يتمنع من دخول مجلس النواب هو نتي لأنك ديما فصداعات مشاكل مع الصحفيين وزيد عليها “الأدوار” المشبوهة لي كاديري والوساطات المشبوهة بين البرلمانية والوزارة.

خاص بنعلي تجري عليك، لأنك كتسيئي ليها، بل كتبغي تحكمي فيها وتبين بلي راها وزيرة ضعيفة.
واش كاين شي مستشار تيحبس وزير من الكلام. اوا هاد المستشارة الاستقلالية هي لي كادير هاد التصرفات ديال “زمن البصري” في مؤسسة دستورية خدامة بدستور 2011.

طبعا كاين لي كيبرر هاد السلوكات الغبية، بحيث ان هاد المستشارة معندها حتى خدمة اصلا، المهنة الوحيدة هي انها خدامة فريع الدواييين، ومكاينش شي ديوان ديال الوزراء السابقين مدخلات ليه.

هاد المستشارة الغبية خصها تعلم من وزير الداخلية عبد الوافي لفتيت، جا عندو صحفي بجريدة الصباح كيف عاينات “كود”، ورحب به، والصحفي طلب من لفتيت حوار صحفي. الوزير تجاوب بكل احترام للزميل الصحفي بلي مرحبا ويجي للبيرو عندو.