گود سبور//

انتقد البرتغالي ميگيل كاردوسو مدرب ماميلودي صن داونز الجنوب إفريقي بطل دوري أبطال إفريقيا، ظروف العمل فالكورة الجنوب افريقية والبنية التحتية والملاعب، وقاليهم باش يديرو المغرب مثال ديالهم ويخدمو كيفما خدم فهاد المجال، وقدر يطور الكورة المغربية ويهرب على القارة الأفريقية.

وفتصريح له بعد ماتش ماميلودي صن داونز وشيبا يونايتيد ضمن منافسات البطولة الجنوب إفريقية، قال ميگيل كاردوسو: “كاينة بلاد فإفريقيا مختلفة عن البقية، وهي المغرب، سيرو ليها وشوفو الطريقة وتطور الكورة عنده، وكيفاش موفرين الظروف باش يقدرو اللعابا يلعبو فمستوى طالع”.

وكمل المدرب البرتغالي: “كانتفكر ورا كاس العالم، قالت جنوب إفريقيا أنها غادي تصغر الفارق مع المغرب، ولكن هذا الشي ما غاديش يوقع فهاد الظروف، راه غادي تنزاد الفجوة مع المغرب وتكبر، حيث المغرب عرف أن ظروف اللعب المزيانة، غادي تعطي ماتشات أحسن، وترفع من مستوى اللاعبين، وتعاون المنتخب الوطني على التطور”.

وزاد البرتغالي ميگيل كاردوسو مدرب ماميلودي، وقال: “كايتسنى بيستو موسيماني (مدرب جنوب إفريقيا) عمل شاق بزاف فالمستقبل، إلى كان خاص احسن الفراقي الجنوب إفريقية تلعب فبحال هاد التيرانات، راه هادي ماشي ظروف ملائمة لكرة القدم”.

وسبق لميگيل كاردوسو وجا للمغرب لمواجهة الأندية المغربية فدوري أبطال إفريقيا، وآخرها كان الموسم الماضي ففينال شومبيونزليگ بين فريق الجيش الملكي والفريق ديالو ماميلودي صن داونز.