كود ـ مراكش//

عرفات مدينة مراكش، البارح الاثنين 10 نونبر، عملية كبيرة ديال إتلاف كمية مهمة من اللحوم اللي ما صالحاش للاستهلاك، وصل الوزن ديالها تقريبا جوج طن و300 كيلوغرام.

وحسب مصادر “كود” فالكمية اللي تحجزات كانت فيها لحوم حمراء، ونقانق “صوصيص”، وكفتة، وكلها كانت مخزنة فمحل ديال الجزارة واقع فحي المسيرة الثانية اللي تابع لمقاطعة المنارة.

العملية جات بعد تدخل لجنة مختلطة فيها ممثلين عن السلطة المحلية، المكتب الجماعي لحفظ الصحة، المكتب الوطني للسلامة الصحية للمنتجات الغذائية (أونسا)، ومعاهم حتى عناصر الأمن من الدائرة 11.

من بعد الحجز، تم نقل اللحوم الفاسدة للمجزرة الجماعية فدوار العسكر، فين تدارت عملية الإتلاف حسب المعايير الصحية المعروفة، وتحت إشراف المصالح المختصة، للحفاظ على سلامة المواطنين وضمان الجودة فالمواد الغذائية اللي كتستهلكها ساكنة المدينة.