وكالات//

علنات شركة أمازون الميريكانية الكَبيرة فالتجارة الإلكترونية باللي ناوية تحيد خدمات ديال 14 ألف موظف، فإطار واحد الخطة عالمية باش تنقص المصاريف، واللي كتركّز بزاف على الناس اللي خدامين فالمكاتب.

ما قالتش الشركة شنو هي المناطق اللي غادي يطبقو فيها هاد القرار، غير ذكرت باللي هاد التغييرات عندها علاقة بتقوية القدرات ديالها فمجال الذكاء الاصطناعي.

فبيان رسمي فالموقع ديال أمازون، قالت بيث غاليتي، نائبة الرئيس اللي مكلفة بالموارد البشرية والتكنولوجيا، باللي هاد الخطوة داخلة فجهود الشركة باش تنقص من البيروقراطية وتعاود توزّع الموارد، وتبدّل شوية فالتنظيم باش تولّي الخدمة أكثر فعالية.

وقالت غاليتي حتى باللي التخفيض غادي يمس بعض القطاعات، ولكن فنفس الوقت غادي يبقاو كيوظّفو فمجالات أخرى، ومع ذلك غادي ينقص العدد الإجمالي ديال الناس اللي خدامين فالمكاتب بحوالي 14 ألف من أصل 350 ألف موظف مكتبي، من بين 1.5 مليون موظف فالعالم كامل.

الصحافة الأمريكية قالت حتى هي باللي عملية الطرد غادي تبدا نهار الثلاثاء، وكيترقّب يكون العدد الإجمالي ديال الناس اللي غادي يتأثرو حوالي 30 ألف فالشهور الجاية، ولكن العمال ديال المستودعات ما غاديش يتأثرو بزاف بهدشي.

وزادت غاليتي قالت: “خاصنا ماننساوش باللي العالم كيتبدّل بسرعة، وهاد الجيل ديال الذكاء الاصطناعي هو أكبر تحوّل من بعد ظهور الإنترنت”.