كود قلعة السراغنة//
ليلة الأربعاء 03 شتنبر، موسم “بويا عمر” فـ إقليم قلعة السراغنة تقلّب على نغمة مأساوية، بعدما طاحت منصة ديال العروض الغنائية بشكل مفاجئ ملي تزاحمو عليها الزوار. اللحظة كانت مرعبة وخلات حالة من الفوضى والخوف وسط الحاضرين.
المعطيات اللي خرجات كتقول باللي الحادث خلى راجل وامرأة يتصابو بجروح وكسور خطيرة، وتنقلو على وجه السرعة للسبيطار باش يتداوا.
هاد السقوط فضح من جديد طريقة تنظيم الموسم اللي ديما كتتهم بالارتجالية وضعف شروط السلامة، خصوصا وأن هاد المناسبة كاتجمع آلاف ديال الناس من مناطق مختلفة من المغرب.
السلطات المحلية من بعد الحادث تحركات وفتحات تحقيق باش تعرف شنو واقع بالضبط، لكن الأصوات المنتقدة كتقول باللي بحال هاد الفواجع كان ممكن يتفادوها لو كان التنظيم محكم والسلامة محطوطة فالأولويات.
