وكالات//

علنات وزارة الصحة فالأرجنتين، نهار الجمعة، أنها بدات تحقيق رسمي فوفاة 38 مريض، اللي كيتشكّو باللي ممكن يكونو خداو جرعات ملوثة من مادة الفنتانيل، اللي هو واحد النوع من الدوا مسكّن قوي بزاف، كيتستعمل فالعلاج ديال الآلام القوية بحال ديال السرطان.

دابا السلطات كتحاول تعرف واش هاد الوفيات عندها علاقة مباشرة مع دفعات ملوثة من هاد الدوا المخدر.

الوزارة قالت أن الهيئة الوطنية لسلامة الأدوية لغات الترخيص المؤقت لشي سلسلات ديال الصيدليات، حيت ما عطاوش الوثائق اللي خاصهم يقدموها فشي مراقبة روتينية. وتزاد على هادشي أنهم حجزو كميات من الفنتانيل تابعين لشركة الأدوية “إتش إل بي”، من بعد ما بداو كيوصلو تقارير على وفيات فمستشفيات مختلفة، من بعد ما تعاطاو المرضى جرعات فيها شك بأنها ملوثة بالبكتيريا.

الفنتانيل معروف بلي راه من أقوى المواد المخدرة المصنعة، القوة ديالو كتفوت المورفين بأكثر من 100 مرة، وكيتعطا بجرعات صغيرة بزاف فحالات الألم المزمن ولا فالمراحل الأخيرة من السرطان. ولكن واخا فعال، راه خطر كبير من ناحية الإدمان والموت، خصوصاً إلا كان الاستعمال ديالو ماشي آمن.

من قبل، كان الفنتانيل سبب فكارثة فميريكان، تسبب فوفاة عشرات الآلاف بسبب الاستعمال العشوائي ديالو، وهادشي خلا بزاف ديال الدول يشددو المراقبة على الإنتاج والتوزيع ديالو. ودابا باين أن الأرجنتين حتى هي داخلة فواحد المرحلة صعيبة مع هاد الدوا، وبدات الشكوك كتكثر على سلامة سلاسل التوريد المحلية.

وزارة الصحة نبهات الناس ومقدمي الرعاية الصحية باش يردو البال، وأي أعراض غريبة من بعد ما يتستعمل شي دواء مسكن، خاصهم يبلغو عليها، حتى تكمل التحقيقات. وقالت أنها خدامة مع القضاء والجهات الرقابية باش يتحاسبو المسؤولين ويتخذو إجراءات باش ما يتعاودش هادشي.