وكالات//

علنات وزارة الصحة فالبرازيل على ارتفاع خطير فحالات التسمم بالميثانول، من بعد ما شربو الناس مشروبات كحولية مغشوشة، وهادشي تسبب فـ وفاة على الأقل 13 شخص، وزيد عليهم حوالي 200 واحد آخرين كيشتبه ف أنهم تسممو فمناطق مختلفة من البلاد.

فبلاغ رسمي، الوزارة قالت باللي من بين هاد الحالات، تأكدات 14 حالة تسمم بالميثانول، وباقي كيتحللو مئات الحالات الأخرى. ووضحات أن جوج ديال الوفيات عندهم علاقة مباشرة مع المشروبات السامة. أغلب الإصابات كانت فولاية ساو باولو، اللي حتى فيها توقعات د جوج الوفيات، وزيد عليهم 11 حالة فـ بيرنامبوكو و5 حالات فـ ماتو غروسو. وفقط فـ 24 ساعة، تزادت تقريبا 80 حالة جديدة، وهادشي خلا السلطات الصحية تعيش فقلق كبير.

باش يحاولو يسيطرو على الوضع، الحكومة قررات تشري 2500 جرعة من دواء سميتو فومبيزول، اللي كيتستعمل فالعلاج ضد تسمم الميثانول، من عند شركة يابانية وبمساعدة من منظمة الصحة للبلدان الأمريكية، والدفعة غتوصل خلال السيمانة الجاية.

وزير الصحة ألكسندر باديلا قال: “الوضع خطير وكيشكل حالة طوارئ طبية”، وحذر باللي الميثانول كيتحوّل فالجسم لمواد خطيرة بزاف، كتهاجم الجهاز العصبي والكبد، وممكن توصل للعمى ولا حتى الموت. وزاد قال باللي من بين الأعراض كاين التعب القوي، مشاكل عصبية، وفقدان الوعي.