سهام البارودي – كود//

فالتعليقات على مقالات گود كاين جوج د الانواع ديال الباشار:

-النوع الاول هو المحبّين هذا ماغانهضروش عليه دابا

-النوع الثاني هو الحاقدين ( الهايترز)، ووسط هاد الحاقدين كاينة نسبة كبيرة لي ضد الخط التحريري و التوجه الحداثي التنويري ديالنا كمنبر اعلامي فريد من نوعه. هادو لي ضد الخط التحريري نسبة كبيرة منهم (ماشي كلشي طبعا) فاش كانقرا التعليقات ديالهم نقدر نشم فيهم ريحة تاداعيشيت و تا ارهابيت مخلّطة بالحزقة و الكبت، حيت اش غانسميو واحد مثلا فاش كانهضرو معاه على حقوق المرأة و انها خاصها تقرى و تخدم كايجي واحد يكتب ” الخوت سينياليو هاد الباج ” و لا فاش كاتكتب مقال على كثرة المضاربات و الاجرام فرمضان و لا على الشوارع لي كايسدوهم المصلين فصلاة الجمعة و لا على انه الحج خاصو يمشي ليه الانسان لي بصحتو ماشي لي مهلوك …. كاتلقاه كايتّهمك بالكفر و الزندقة و الخروج عن الملة لا لشيء إلاّ لأنك قستي ليه فديك البركة الآسنة ديال المعتقدات العوجة ديالو.

فالتعليقات على مقالات گود كاينين بزاف ديال الارهابيين في طور النمو، كيما كاينين فالزنقة و لاصال و المدرسة و الجامعة و المارشي، فلداخل ديالهم ناعس ابو مصعب الزرقاوي  و لا شي يوسف فكري و لا شي عبد الكريم المجاطي و مازال ماخرجّوهش لبرّا حيت مازاعمينش، خايفين من المخزن اما كون توفر ليهم المناخ باش يمارسو الداعشية ديالهم كون واااا راه شحال هادي فرگعو لينا شي كوكوط فمقر گود لي خاوي اصلا، و لا فخخوا البشكليطة ديال سقراط.

أنا شخصيا اي واحد كايجيني كاره كبير لگود و حاقد على مقالات گود و كتابها راه فيه الدغل، فيه ريحة الدم، گود هي السانسر ( الديتيكتور) ديال الدواعش فالمغرب، طبعا ماشي اي واحد مامتافقش مع گود راه هاكّا و لكن نسبة كبيرة هاكّا و متّ هاكّا.

داكشي علاش كانقولو الحمد لله على نعمة المخزن

و لَي ماحبّنا… يدو فالگيدون !