كود سبور//

وللا ضروري كابرانات العسكر الجزائري والحماق ديال مرتزقة البروليزاريو يخليو البصمة ديالهم الشريرة فالمنافسات الرياضية والكروية المقامة بالجزائر، باش يخففو من هول إخفاق الكرة والرياضة الجزائرية، اللي عسكرها شنقريحة وصاحبو تبون حتى ولات عاطياها غير للإخفاقات والخسران، وهاد المرة ناويين يبرزطو المنتخب الوطني المغربي للفتيان ملي يلعب فينال كأس إفريقيا لأقل من 17 عام مع السنغال.

وناضو أتباع شنقريحة وتبون، باغيين يستغلو فينال مسابقة لكرة القدم مرة أخرى سياسيا، والأكثر من هذا أنها مسابقة خاصة بأطفال صغار كيأطرها الاتحاد الإفريقي لكرة القدم وكتحميها مواثيق ومعاهدات إفريقية ودولية، وضربو هادشي كامل بعرض الحيط وجايبين حفنة من مرتزقة البوليزاريو إلى العاصمة الجزائرية اللي كتحتضن فينال كأس إفريقيا لأقل من 17 عام، بين المغرب والسنغال، الجمعة المقبل بملعب نيلسون مانديلا، وقررو ينظمو ماتش بين فريق كيسميوه الجمهورية الصحراوية الوهمية لكرة القدم أمام مولودية الجزائر السبت الجاي بنفس الملعب، والهدف هو التشويش على المنتخب المغربي واستفزاز الأشبال، تحت ذريعة الاحتفالات بالذكرى 50 لتأسيس عصابة البوليزاريو، والمدهش أن هذا التخربيق د عسكر الجزائر كيخالف قوانين الاتحاد الإفريقي والاتحاد الدولي الفيفا، اللي ما كيعتارفوش بشي فرق أو منتخبات تابعين لعصابات أو منظمات إرهابية بحال مرتزقة البوليزاريو.

الكابرانات ديال الجزائر، وحيث خسر منتخبهم بالكرة واللعب بثلاثية لزيرو أمام المنتخب المغربي وتسبب في إقصائهم من ربع نهائي كأس إفريقيا لأقل من 17 عام، ما تسرطاتش لهم وجايبين هذا لكروب التابع لمافيا البوليزاريو باش يشوشو على سعيد ووليداتو، وهذا لكروب يقدر يكون شي فريق جديد كيقلب على الاعتراف به من الاتحاد الجزائري لكرة القدم، وعلاش لا يولي حتى هو فالمستقبل ممارس بالبطولة الجزائرية ويتقاسم مع الجزائريين دوري كرة القدم ديالهم، بعدما قسمت العصابة اللي حاكمة لالجيري مع البوليزاريو ومنذ سنوات، خير الشعب الجزائري اللي الأخير أولى به، ولكن جنرالات شنقريحة وتبون كيصيفطوه لحفنة ديال المزتقة بتندوف وهذا الشي غير ضد فالمغرب وصافي.