گود سبور//

كاينة إجراءات صارمة فعملية بيع تذاكر ماتش روتور دومي فينال كأس الكونفيدرالية الإفريقية، بين أولمبيك آسفي واتحاد العاصمة الجزائري اللي غادي يتلعب الاحد الجاي فتيران المسيرة الخضراء فآسفي.

بيع التذاكر غادي يكون من خلال 4 ديال الدفعات، اللولة غادي تبدا اليوم الاربعاء مع الظهر والأخيرة يوم السبت الجاي، وكاين الزيار فعملية البيع ضد صحاب المارشي نوار، مع فرض الإدلاء ببطاقة التعريف الوطنية بالنسبة لأي واحد بغا يقطع التيكي، وكل شخص عندو الحق يقطع 2 تذاكر ما يفوتهمش، والثمن تحدد فـ30 درهم للمدرجات العادية و250 درهم للمنصة المغطاه، والماتش غادي يتلعب بگيشي فيرمي.

أولمبيك آسفي باغيين يحققو تأهل تاريخي لفينال كأس الكونفيدرالية الإفريقية هذا العام، بحصد نتيجة إيجابية فروتور الدومي فينال ضد اتحاد العاصمة، بعدما سالا ماتش الذهاب فالجزائر بنتيجة التعادل السلبي زيرو لزيرو.