كود سبور//

تأهل المغرب الفاسي إلى ربع نهائي كأس العرش، بعدما ربحو البارح الخميس فريق الفتح البيضاوي اللي كيلعب فالهواة، فماتش كان صعيب وعرف احتجاج مرة اخرى من المصاويين على اسماعيل الجامعي ومازال كيطالبوه يمشي بحالو من محيط الفريق.

وسالا الماتش بين المغرب الفاسي وفريق الفتح البيضاوي بنتيجة واحد لزيزو لمصلحة الماص، ماركاه لهم حمزة الجناني من بيلانتي فالدقيقة 16 من الماتش اللي تألق الگول المصاوي رضا التگناوتي وحبس فرص خطيرة للفريق الكزاوي، وغيلعبو الماص فالربع مع المتأهل من ثمن النهائي بين المغرب التطواني وشباب السوالم.

وعن نفس الدور وفنفس التوقيت، قدرو حسنية أكادير يربحو فريق الاتحاد الإسلامي الوجدي اللي كيلعب فالقسم الثاني، فالتيران الكبير لأكادير، بنتيجة 2 لزيرو، ماركا لهم سفيان المودن الهدف الأول فالدقيقة 84، وكاتلوندي زاد الثاني فالدقيقة الأخيرة، وتأهلو الحسنية لربع النهائي وغيلعبو ضد مولودية وجدة.