كود سبور//
واصل الرجاء الرياضي المستوى الكارثي ديالو، وضمن الخروج بزيرو لقب فهذا الموسم، بعدما فشل فالحفاظ على لقب كاس العرش، وتقصى من دور ثمن النهائي بخسارة أمام الاتحاد الإسلامي الوجدي المنتمي للقسم الثاني، وصيفو بكري مع غريمهم الوداد الرياضي اللي حتى هما تقصاو من نفس الدور على يد المغرب التطواني.
وسالا الماتش بين الاتحاد الإسلامي الوجدي فتيران وجدة السبت بنتيجة 2 لواحد لمصلحة الوجديين، اللي ماركاو هما الاولين فالشوط الأول بواسطة اكليدو فالدقيقة 25 ومن وراها كملو الرجا اللعب ناقصين بعض طرد محمد بولكسوت مع نهاية الشوط الأول.
وفالشوط الثاني قدرو الرجاء الرياضي يماركيو التعادل بواسطة أدم النفاتي فالدقيقة 79 من بينالتي تحصل عليه الحسين رحيمي، ومشاو الفراقي بجوج لعبو الأشواط الإضافية اللي عرفت طرد لاعب الوجديين حمداوي، ولكن قدرو يخطفو هدف الرباح بواسطة الحميدي فالدقيقة 117.
وبهذه النتيجة ودع الرجاء الرياضي كأس العرش من ثمن النهائي، وتأهل الاتحاد الإسلامي الوجدي إلى ربع النهائي فمفاجأة كبيرة، وغايلعبو ضد أولمبيك اسفي.
