گود سبور//

تعرف المنتخب الوطني المغربي المشارك فـ كأس العرب 2025، على الخصم ديالو فـ نهائي البطولة المقامة حاليا بقطر.

وغادي يلعب المنتخب الوطني المغربي نهائي كأس العرب ضد المنتخب الأردني اللي كايدربهم المدرب المغربي جمال السلامي، واللي كايعرف مزيان المنتخبات المغربية وفايت له درب المنتخب المغربي المحلي.

وقدر جمال السلامي يؤهل المنتخب الأردني لنهائي كاس العرب، بعدما قادهم للرباح على المنتخب السعودي ومدربهم الفرنسي هيرفي رونار فـ الدومي فينال اليوم الاثنين، بنتيجة واحد لزيرو.

وغادي يتلعب نهائي كاس العرب بين المغرب والأردن، يوم الخميس الجاي فـ تيران خليفة الدولي بالعاصمة القطرية، بين وليدات طارق السكتيوي ووليدات جمال السلامي اللي قدر يصنع منتخب أردني قوي بعدما كمل الخدمة اللي كان بداها قبل منو الحسين عموتة.