عمر المزين – كود//
المغرب عايش هاد الأيام على وقع أجواء استثنائية مع تنظيم كأس أمم إفريقيا 2025، حيت الحماس ما بقاش غير فالملاعب ولا فالشوارع، ولكن واصل حتى لمطارات المملكة اللي تحولو لفضاءات ديال الفرجة والتشجيع والاحتفال.
ومع التألق ديال المنتخب الوطني وتجاوزو الدور الأول بنجاح، ولات الأجواء أكثر سخونية، خصوصا داخل Fan Zones اللي تدارو خصيصا داخل عدد من المطارات.
هاد الفضاءات، حسب بلاغ صادر عن المكتب الوطني ديال المطارات، خلاّت المسافرين والمشجعين، سواء المغاربة ولا الجايين من مختلف الدول الإفريقية وحتى من خارج القارة، يعيشو لحظات جماعية عامرة بالحماس والفخر والانتماء.
وقت بث الماتشات، قاعات الانتظار فالمطارات تبدلات وولات بحال مدرجات صغار، فين كيتسمعو التصفيقات، والضحكات، وكيبان واحد الانسجام كبير بين الناس، فمشهد كيعكس كيفاش كرة القدم كتجمع وكتوحد.
هاد المبادرة، حسب المكتب، كتجسد الدينامية الشعبية اللي عرفها تنظيم كأس إفريقيا 2025، وكتعطي صورة إيجابية على المغرب كبلاد منفتحة، منظمة، وواثقة فإمكانياتها، وكتأكد باللي “أسود الأطلس” ما بقاوش غير منتخب كروي، ولكن ولات رمز للوحدة والطموح ديال شعب كامل كيتطلع لمزيد من النجاحات.
