كود سبور//

ضيع المنتخب الوطني المغربي لأقل من 20 عام، فرصة التتويج بلقب كأس إفريقيا U20 للمرة الثانية فالتاريخ ديالو، بعدما خسر الفينال مع جنوب إفريقيا، اليوم الاحد بالعاصمة المصرية القاهرة اللي نظمت هذه النسخة.

وسالا الماتش بين المنتخب المغربي ومنتخب جنوب إفريقيا بنتيجة واحد لزيرو لمصلحة الجنوب أفريقيين، مع العلم أن لاعبين المنتخب المغربي هما اللي كانوا مسيطرين على الكورة فالماتش وخلقو بزاف ديال الفرص، ولكن قلة التركيز والتسرع وتألق الگول ديال جنوب إفريقيا خلاهم ما يماركيوش، والهدف ديال الجنوب إفريقيين عكس مجرى اللعب فالشوط فالدقيقة 72 من الشوط الثاني وبسبب غلط ديال دفاع الأشبال.

وعرف ماتش الفينال حضور فوزي لقجع رئيس الجامعة الملكية المغربية لكرة القدم، والناخب الوطني وليد الركراكي والمساعدين ديالو، مقابل حضور رئيس الاتحاد الإفريقي لكرة القدم، الجنوب إفريقي باتريس موتسيبي.

وبهذه النتيجة ضيع المنتخب الوطني المغربي التتويج بكاس أفريقيا للشباب للمرة الثانية، بعدما ربح الوحيدة عام 1997، ملي فاز على جنوب إفريقيا فالمغرب، وبالمقابل فالجنوب إفريقيين بهذه النتيجة ربحو اللقب لأول مرة فتاريخهم.