كود الرباط//

علمت “كود” من مصدر مطلع أن اجتماع المكتب السياسي لحزب الحركة الشعبية برئاسة الأمين العام للحزب محمد أوزين. يوم الجمعة الماضي، شهد نقاشا حادا بين قيادات المكتب السياسي حول من سيخلف محمد مبدع على رأس لجنة العدل والتشريع.

وكشف مصدر قيادي بأن المكتب السياسي مبغاش يعطي إشارات واضحة بخصوص اعتقال محمد مبدع، وبلاصت ما يدير خطوة جريئة بتجميد عضوية مبدع إلى حين الحكم عليه، حاول يغطي على الفضيحة بعدم إثارة الموضوع ودارو توجيه للقيادات ميهضروش مع الصحافة على مبدع.

وأكد ذات القيادي لـ”كود” أن التهم لي عند مبدع خايبة بزاف، وكان على المكتب السياسي يعطي موقف إيجابي من محاربة الفساد السياسي بحكم تواجده بالمعارضة.

وتابع المصدر: “مفهمناش كيفاش تفاهم مبدع مع جوج مرشحين كينافسوه على رأس لجنة العدل والتشريع، للي تراجعو على الترشيح وخلاو مبدع بوحدو، هاد المرشحين هوما عادل السباعي وعيدودي صاحب مقولة “كشة مشة”. مشددا هذا خطأ سياسي وأخلاقي كيتحملها محمد أوزين.

دبا خرجات تسريبات كتقول بلي كاين توجه تكون مرا رئيسة لجنة العدل والتشريع، هاد المرا هي زوجة قيادي في المكتب السياسي للحزب. ردو الحزب للعائلات وصحاب الفلوس وصافي.