عمر المزيـن – كود///

وجه بلاغ صادر عن الديوان الملكي، اليوم الإثنين، ضربة موجعة لحزب العدالة والتنمية، خاصة قياديو المصباح الذي وقع أمينهم العام السابق، سعد الدين العثماني، اتفاقيات استئناف العلاقات مع إسرائيل.

الديوان الملكي عبر عن رفضه للابتزاز بالقضية الفلسطينية، مؤكدا أن بيان الأمانة العامة لحزب العدالة والتنمية يتضمن بعض التجاوزات غير المسؤولة والمغالطات الخطيرة في ما يتعلق بالعلاقات بين المملكة المغربية ودولة إسرائيل، وربطها بآخر التطورات التي تعرفها الأراضي الفلسطينية المحتلة.

إلى حدود الساعة قيادة البي جي دي صارطين لسانهوم. “كود” تعيطات للأمين العام عبد الإله بنكيران واللي قال بالحرف: “معندي تعليق هاد الساعة”.

“كود” حاولت التواصل مع قياديين فالحزب لكن حتى شي حد مافيهم مابغا يجاوب. واش بلاغ الديوان الملكي يقدر يدفع بقيادة العدالة والتنمية باش تراجع المواقف ديالها على القضية الفلسطينية اللي كتخدم بها أجندتها السياسية هادي مدة؟.

نساينو دبا شنو غادي تدير الأمانة العامة لحزب المصباح. واش غادي تكون شي استقالات ؟ واش يقدر بنكيران يتخلى على الإخوان من بعد هاد التصرفيقة؟، خاصة وأنه كان دفاع على الاتفاق ديال استئناف العلاقات بين الرباط وإسرائيل وكان قال لـ”كود” باللي سيدنا هو اللي مكلف بالعلاقات الخارجية حقاش عارف آش كيدير.

مصطفى الرميد القيادي السابق في حزب العدالة التنمية حاولت “كود” تاخد موقفو من بلاغ الديوان الملكي اللي كان واضح، واكتفى بالقول: “لقد استقلت، فارحت واسترحت”، فيما رفض آخرون التعليق ومن بينهم إدريس الأزمي الإدريسي رئيس المجلس الوطني لحزب المصباح.