كود الرباط//

كذوب جديدة كيروجوها الإسلاميين، بعدما خسرو معركة “مقاطعة موازين” ومبقاش عندهم تأثير على الجيل الصاعد والجيل الحالي، وهزمهم الرابور طوطو ف الواقع وف السوشل ميديا بشعبية كبيرة ديال ستار حقيقي كيفتخرو به المغاربة. هاد الكذوب هي لي داروها ف شكاية رفعوها للهاكا ضد دوزيم.

مصدر من البي جي دي كشف للصحافة بلي الهيأة العليا للاتصال السمعي البصري (الهاكا)، توصلت يوم الاربعاء 2 يوليوز 2025، بشكاية تتعلق بشبهة خرق القناة الثانية 2M لمقتضيات دفتر التحملات الخاص بها.

في ما يلي نص الشكاية كما توصلت بها الهاكا حسب نفس المصدر: “بثت القناة الثانية 2M يوم الثلاثاء 1 يوليوز 2025، ابتداء من الساعة 23:05، سهرة من سهرات مهرجان موازين، لشخص في هيأة غريبة، يرتدي لباسا يحمل كلمة “salgot” مع وضع نجمة العلم المغربي وسط الكلمة، بالإضافة إلى ترديده كلمات نابية، منها “قودوها قودوها”، ويحرض الجمهور على ترديدها معه”.

هادشي كله كذوب، أولا الشخص ماشي ف هيأة غريبة، هذاك ستيل ديالو، يعني هاد الإسلاميين أصلا ضد الفن وضد أي إبداع سواء ف اللباس أو أي حاجة اخرى، ثانيا كلمة salgot مكايناش ف اللبسة، بل SALGOAT واللي فيها كلمة GOAT اي GREATEST OF ALL TIME اللي القصد ديالها *الواعر في مجاله” او الأعظم ف الضومين ديالو، اختارو حيت الاسم حرفيا قريب لكلمة سلگوط وهي كلمة نعتو بيها رئيس الحكومة السابق عبد الإله بنكيران، زعيم الإسلام السياسي، حيث اعتبر أن طوطو والأمثال ديالو سلاگط.

النعث بالسلگوط، خداها طوطو فكرة لتسمية العمل الجديد بطريقة مقصودة واللي ساعات قليلة مور ما لاحو جاب عدد مشاهدات ردا على استفزاز بتميزات، واللي بغا يوصل من خلاله أنه داك اللي نعتيه بالسلكوط ها علاياش قاد، وأكد هادشي بتغريدة صريحة على موقع X.

البي جي دي قال فالشكاية بلي هادشي لي داز ف دوزيم “يعتبر إخلالا من القناة الثانية بمقتضيات دفتر التحملات الخاص بها، لاسيما الفقرة الثالثة من المادة 3. حيث إن شأن الهيأة التي ظهر عليها الشخص المعني فوق المنصة، وكذا ترديده للكلمات النابية، أن تعرض السلامة الأخلاقية والنفسية للجمهور للخطر، فضلا عن كونها تمس بالكرامة الإنسانية وبالأخلاق العامة”.

“قودوها قودوها” بدا الجمهور يرددها تفاعلا مع طراك كيغنيه طوطو، الالاف من الشباب عجبهم وناشطين. إلى متى غايكون الحجر عليهم ودير عليهم الدولة الوصاية حيث البي جي دي معجبهمش الحال؟.

اللي مبغاش طوطو ينتج فن ويبدع فالموسيقى، يبدع هو! ولكن للأسف ميمكنش تيار أصلا هو ضد الفن وضد الإبداع وضد حرية المرأة وضد الحريات الفردية يبدع، لأنه مسلح بفكر ومرجعية متكلسة.