كود ـ الرباط//

الاستقلاليين مايقد عليهم غي اللي خلقهم. نزار بركة اللي بدا المعارضة من قلب الحكومة. رجع اللور وخرج الأذرع الاستقلالية تهاجم الحكومة.

رابطة الاقتصاديين الاستقلاليين اللي شحال وهي صاقلة وضاربة الطم وكاين فيها اللي كيظل يدور على الصفقات والهموز فدواوين الوزارات، خرجت بمذكرة كتنتقد فيها سياسة الحكومة فعام 2025 وكطالب بميزانية طموحة ف 2026.

هاذ قوالب الاستقلاليين مجاتش من فراغ… نزار بركة كينقل من تاريخ نسيبو عباس الفاسي ملي كان وزير مع عبد الرحمان اليوسفي وكيحفر ليه من داخل الحكومة وفالأمتار الأخيرة قال عباس قولته الشهيرة فمولاي إدريس زرهون آ مولا نوبة.

علاش رابطة الاستقلاليين متهضرش على التخليق داخل القطاعات الحكومية اللي شادينها الاستقلالية ومدورينها بيناتهم عطيني نعطيك واش هاذ العجز فوزارة الماء ووزارة النقل مبانش ليهم بقى ليهم غي يقولو بغينا عمي نزار رئيس الحكومة باش تزوهر عندهم بزنس وصفقات وريع وهموز.