كود سبور//

طلبت قنصلية المغرب فمدينة ألميريا فإسبانيا من المغاربة اللي ساكنين فيها باش يتجنبو المشاحنات فماتش المنتخب الوطني المغربي والمنتخب الإسباني غدا الثلاثاء فثمن نهائي كأس العالم قطر 2022، ويتحلاو بالروح الرياضية.

ووجهت قنصلية المغرب ميساج لمغاربة مدينة ألميريا الإسبانية والجمعيات ديال الجالية المغربية فيها وقالت لهم فإعلان نشراتو: “تزامنا مع ماتش المنتخببين المغربي والإسباني يوم الثلاثاء، وتفاديا الاصطدامات ما بين انصار ومشجعي المنتخبين، ضروري ينخرط الجميع فعملية تحسيس الجالية المغربية بخصوص اجتناب حالات الشغب اللي ولات كترافق بعض المباريات واللي كتسبب فخسائر متفاوتة ما كتوقفش عند تخريب الممتلكات الخاصة والعامة ولكن كتوصل لتهديد سلامة وأمن الأشخاص”.

وزادت كملت قنصيلية المغرب فالمدينة الإسبانية وقالت: “كنطلبو من الجميع التحلي بالروح الرياضية والأخلاق الحسنة المبنية على السلوك الراقي سوا فالرباح أو فالخسران”.