كود – وكالات//

أمر الرئيس الأمريكي دونالد ترامب وزارة الدفاع الأمريكية تنقص من المناورات العسكرية المشتركة مع كوريا الجنوبية، اللي كانت غا تبدا هاد السيمانة، وقال بلي هاد التدريبات كتقام بالتمن وكتعطي «إشارة غير مناسبة وعدائية» لكوريا الشمالية.

ترامب ربط القرار حتى برفض كوريا الجنوبية التعاون مع مريكان فجهود نزع السلاح النووي من إيران وقال ,انه طلب من الرئيس الكوري الجنوبي يشارك واشنطن فهاد القضية،ولكن الجواب كان: «لا، شكراً».

المناورات، اللي كتمتد لـ11 يوم وكيشارك فيها  18 ألف جندي كوري جنوبي، الهدف منها هو رفع جاهزية القوات الأمريكية والكورية الجنوبية لمواجهة أي تهديد محتمل من كوريا الشمالية.

القرار جا فوسط تصعيد جديد، بعدما هددات بيونغ يانغ باتخاذ «إجراءات » ضد واشنطن وسيول، ووصفت المناورات بأنها تدريب على «حرب عدوانية». وقبل أيام، عاودات كوريا الشمالية تجارب إطلاق صواريخ باليستية.

ترامب عندو علاقة خاصة مع الزعيم الكوري الشمالي كيم جونغ أون، حيث سبق ليهم تلاقاو ثلاث مرات فالولاية الأولى ديالو، خصوصاً لمناقشة البرنامج النووي الكوري الشمالي.

وماشي أول مرة كيحاول ترامب يوقف هاد المناورات، حيث سبق ليه ف 2018 وصفها بـ«استفزازية»، وقال بلي إيقافها غادي يوفر فلوس كتيرة.