كود -ورزازات//

فهاد تواخير الضومين الفني السينمائي فالمغرب، تحرك بأعمال محلية ودولية، فهاد السياق تم الإعلان على جوج مشاريع كبار، كيعكسو التطور اللي وصلات ليه السينما والدراما فالمملكة.

على الصعيد الدولي، تعلن على مسلسل تيلينوفيلا مكسيكي سميتو “قلب المغرب”، وكيتعتبر من اكثر المشاريع لي فيها تعاون ما بين المغرب وأمريكا اللاتينية، المسلسل من إنتاج المنتجة المكسيكية روسي أوكامبو، وكيشاركو فيه نجوم كبار بحال خوسيه رون، أفريكا زافالا، وكلوديا ألفاريز، القصة كتدور على بنت مغربية كتهرب من زواج مفروض وكتبدا حياة جديدة فالمكسيك، فين كتلاقى بوريث ديال إمبراطورية ديال المجوهرات، وسط قصة فيها صراعات عائلية واختلافات ثقافية.

العرض لول غايكون فيناير 2027 فـبلاطو ديال  “يونيفيجن” و”فيكس”، ومن بعد فـقناة “لاس إسترياس” المكسيكية، طاقم العمل اختار بزاف ديال المدن المغربية باش يتصورو فيها المشاهد، على قبل التنوع الطبيعي والثقافي اللي كيميز المغرب، بالإضافة للبنية التحتية، وهاد الشي كيبين باللي المغرب ولى شريك حقيقي فصناعة المحتوى العالمي، ومنصة إبداعية كتشّد الانتباه من مختلف أنحاء العالم.

أما وطنيا كشف المخرج المغربي هشام الجباري على الفيلم الجديد ديالو “الهايبوش”، اللي قال عليه بأنه حلم سينمائي كان كيرافقو من سنين، الفيلم مقتبس من قصة ديال أحمد المدفاعي، وكيعطي حكاية واقعية فيها أبعاد إنسانية واجتماعية، وكيشارك فالفيلم مجموعة ديال النجوم المغاربة بحال محمد خيي، عزيز داداس، كمال كاضيمي، هند السعديدي، جليلة التلمسي، وفاطمة الزهراء الجوهري، مع علي الركاب فالتصوير وأمينة الرايسي فالإدارة الفنية.