كود سبور//

خبار كيرسكل فمواقع التواصل وحتى فبعض المواقع الاخبارية، مكتوب فيه : “حكيم زياش يفجر قنبلة في وجه لقجع والجامعة ومصطفى حجي : حجي هو سبب استبعادي من المنتخب”.

وكيزيدو من بعد ان هذا أول تعليق ديال زياش بعد إقصاء المنتخب المغربي أمام نظيرو المصري، وكيضيفو انه ماعندو حتى مشاكل مع المدرب خليلوزيتش، وأن كل ما قالو هاد الأخير بأنه ماكانش منضبط غير صحيح نهائيا.

هاد الاشاعة ناسبينها لحكيم زياش، وباش يبان داكشي بصح كاتبين انه عطى تصريح لأحد الصحفيين الإنجليز، واكد ان السبب الحقيقي وراء ابعادو من المنتخب الوطني هو مصطفى حجي اللي كان يتوصل بطلبات من وكلاء لاعبين مغاربة لاستقدامهم للمنتخب. وزعما زياش قال انه متأسف بزاف للطريقة اللي كيتم بها إدارة المنتخب وجلب اللاعبين إذ لا يعتمد فيها على الآداء والجاهزية، بل على العلاقات مع وكلاء اللاعبين وأشياء أخرى..

وباش يزيدو يعطيو مصداقية للاشاعة، قالو ان زياش دار هاد التصريح لصحفي موقع “ذا صان”.. طبعا السيد ما قال والوا وهادي غير ترويجات لا أساس لها من الصحة نظرا لغياب المصدر.

فاش كتدخل لموقع “ذا صان” وكتقلب على هاد التصريحات وهاد “القنبلة”، ماكتلقى والو، اخر مقال على حكيم زياش فالموقع الإنجليزي كان ف23 يناير، ومن بعدو مكاين حتى خبار.