عمـر المزيـن – كود///

قفطان الأميرة لالة حسناء اللي لبسات خلال ترأسها حفل افتتاح مهرجان فاس للموسيقى العالمية العريقة، البارح الجمعة بباب المكينة التاريخية، عجب الحاضرين اللي تابعوا الفقرة الإبداعية التقليدية الافتتاحية: “زرياب او الوتر الخامس”، واللي تم من خلالها استحضار روائع الشاعر والموسيقي الشهير خلال الفترة الأندلسية الزاهية.

وحسب مصدر لـ”كود”، فإن الأميرة لالة حسناء كانت لابسة تكشيطة مخزنية اصيلة، مشيرا إلى أن الخدمة ديالها بلدية مخدومة بالسفيفة ديال الحرير اللي خلات اللبسة تكون مخزنية مائة في المائة، والأميرة كانت لابسة كأكسيسوار “الجوهر الحر”.

وأضاف المصدر نفسه: “داك التكشيطة مخدومة بعين عقدة حتى للرجلين وهي طبيعية ومافيهاش الألوان داخلين ومخدومة لونها فلونها، والخدمة ديالها تتطلب مجهود كبير للصانع التقليدي حقاش مصوبة كلها باليد”.

مصدر “كود” ذكر باللي هاد النوع ديال القفطان اللي عجب حتى رواد مواقع التواصل الاجتماعي “لا يتقادم وكيبقى على مر الأجيال ويتم توارثه جيلا بعد جيل”.