كود سبور//

كاتسنى فريق اتحاد العاصمة الجزائري عقوبة من الاتحاد الافريقي لكرة القدم، بسبب احداث الشغب اللي دارها جمهورهم البارح الاحد فتيران المسيرة الخضرا فاسفي ضد اولمبيك اسفي ضمن دومي فينال كاس الكونفيدرالية الإفريقية.

وكشفت مصادر مطلعة، أن مندوب ماتش روتور دومي فينال كاس الكونفيدرالية بين اولمبيك اسفي واتحاد العاصمة، سجل فالتقرير ديالو الشغب اللي داروه مشجعين الفريق الجزائري ورفعو للجنة الانضباط بالكاف، وهذا الشي من المنتظر يتسبب فعقوبات قاصحين على اتحاد العاصمة، بعدما هبطو المشجعين ديالهم للتيران ودارو الشغب، وهذا الشي تسبب فاصابات لمصورين صحافيين والماتش تعطل ما بداش فوقتو.

وفتحت لجنة الانضباط فالكاف تحقيق فهاد الاحداث من المنتظر تسمع الفريقين بجوج اولمبيك اسفي واتحاد العاصمة الجزائري.

وبدات كاتعطي الريحة ديال هاد احداث الشغب وكايبان انها ماشي بريئة، ووراها اليدين ديال الكابرانات، خصوصا وان احداث شعب جمهور اتحاد العاصمة فماتش اسفي فكاس الكاف مشابهة مع احداث شغب جمهور السنغال فكاس أفريقيا فالرباط، واللي فيها ريحة الأيادي الجزائرية، بعدما كان تشد واحد الفرنسي من اصل جزائري مع المشاغبين السنغاليين، وتبين انه خو مساعد مدرب السنغال اللي حرض لعابتو على الانسحاب.