سهام البارودي – كود//

كاين جوج ديال القطاعات فالمغرب نهار كايخرجو يديرو شي وقفة و لا مظاهرة حتى واحد ماكايتعاطف معاهم لا فالواقع لا فالمواقع بل كاتلقا الناس غا كايسبّو و يعايرو فيهم ! مالين الطاكسيات و الاطباء ! طبعا هذا ماكايعنيش انه گاع مالين الطاكسيات خايبين و لا گاع الأطباء گزّارة! كاينين بنات وولاد الناس فگاع القطاعات ! كاينين لي عندهم ضمير مهني ! كاينين لي كايخدمو من نيتهم و كايعاونو و كايعطيو من وقتهم الشخصي و شي مرات من فلوسهم باش يعاونو المريض !
و لكن واخا هاكاك ! التجارب لي كايعيشوها المغاربة مع هاد الجوج د القطاعات خلاتهم يكرهوهم كره اعمى ! بنادم كايقوليك يا ربي مانمرضش باش مانمشيش للسبيطار ! التكرفيص، ساعات الانتظار الطويلة، السيكيريتي فالباب لي كاينهصر عباد الله ! قلة اليد العاملة و الماتيريال و التعامل الزبلاوي ديال شي موظفين فقطاع الصحة خلا المغاربة مايحملوش فيه الشعرة ! بلا مانضهرو على الرشوة و النوار لي مفروض فالقطاع الخاص !

قطاع الصحة فالمغرب وصمة عار على البلاد ! راه ماليها حتى معنى تعيش فكازا و يكون عندك مدخول مزيان و تمشي بيه للموروكومول و تشد التيجيڤي لطنجة و الترام لعين الذياب و فاش دير شي كسيدة يدّيوك يلوحوك فموريزگو فين سطاشرواحد مؤخرا فقدو الشوف بسباب شي حقنة مات حقنة ! عيب هادشي يكون باقي فالمغرب ! عيب فاش يضربنا الزلزال نكتاشفو بلي المناطق المنكوبة ماعندهاش سبيطار و خاص بنادم كولو يتكب فمراكش باش يدّاوا !

انا شخصيا فاش كنت فالمغرب كنت كانتفادى ما أمكن نمشي للطبيب و عاد انا راه كنت كانمشي للقطاع الخاص زعما ! كلينيك و لا كابيني ماشي السبيطار العمومي و هاكاك كنت كانكره نمشي، حيت عدم احترام المواعيد و الطبيب لي كايقوليك آجي مع الجوج و مايدوزك حتى للربعة ! و التخوفيش و الكذوب و الاستغلال لي كاتعرض ليه فالكلينيكات و الكابينيات كايطلع ليا فراسي ! غا الوجه ديال شي سيكريتيرات هاكاك مغوبشات و خايبات كايهرّبك من العلاج ! هنا لا ! هنا كاتمشي لسبيطار الحومة ، كاتلقى فيه طبيبة د النساء كاتستقبلك بالابتسامة و احترام الوقت و احترام الانسان ! و كلشي بشوش و كلشي مستعد يقدم يد المساعدة !

خاص تعاود تعازيلا فهاد القطاع ! الخاص و العمومي بجوجهم خاصهم شي نوضة فاعلة تاركة ! دوك اللوبيات د الاطباء و داك التسمسير فأرواح عباد الله و داك الوسخ و قلة المعدات و النوار  … خاص هادشي يحبس ! و كيما المغرب حرص فالسنين الاخيرة انه يطور قطاع النقل و الطرق و نشوفو طرقان واعرة فمناطق شحال هادي بنادم فاش يصوگ فيها كان خاصو يقرا اللطيف و يخدم البقرة فالطوموبيل تايفوت الڤيراج ! دابا كانصوگو فيها و حنا كانغنّيو مع بنات قشبل بكل راحة و اريحية!  خاص ضروري شي تدخل فهاد القطاع لي خمج و ريحتو عطات.

راه فحالا كانديرو العكر على الخنونة ! عندنا جوج قطاعات فالمغرب مشوّهين التعليم و الصحة و هوما القطاعات الاكثر اهمية فحياة الانسان ! نعياو مانزوقو ! نعياو مانتصورو ! نعياو مانبغيو ندوزو للعالم صورة د المغرب كدولة متقدمة و قادة بشغلها ! تصويرة وحدة ديال مرا كاتولد فباب السبيطار و لا راجل ميت مهزوز فوق بغلة كافية باش تفرش ليك الطرح و تبين بلي هادشي كامل عكر فوق الخنونة !