وكالات//

واحد القصة الغريبة خلّات الناس كيتكلمو عليها بزاف فـ ألمانيا، بعدما معلّمة خذات كونجي مرضي مدفوع الأجر من عام 2009، وبقات كتشدّ فالخلاص ديالها كامل (حوالي 48 ألف جنيه إسترليني فالسنة)، بلا ما شي حد فالمدرسة يلاحظ أنها ما بقاتش خدامة، وطوال 16 عام!

ووفقًا لصحيفة “ديلي ميل”، السيدة خذات العطلة حيت كانت كتعاني من مرض مزمن ومشاكل نفسية، وكان خاصّهم يعاودو يقيمو حالتها بعد 3 شهور، ولكن ما داروش هاد التقييم، وبقات الإجازة كتتجدّد بوحدها.

الصدمة طراّت فـ 2024، ملي تبدلات الإدارة ودارو واحد التدقيق الداخلي، واكتاشفو أن هاد السيدة ما دازت حتى رجليها للمدرسة من 2009، وحتى المدير اللي كان قبل، ما عمرّو شافها أصلاً!

الدولة دابا طلبات منها تدير فحص طبي باش يتأكدو واش ما زال مريضة ولا لا، ولكن هي رفضات، وقرّرات تجرّ المؤسسة التعليمية للمحكمة.

وسائل الإعلام الألمانية قالت أنها كانت خدامة فجهة “شمال الراين-وستفاليا”، وعندها جوج ديور فالمدينة ديال دويسبورغ.

والمحاميين قالو باللي من الصعيب بزاف يدّيو منها الفلوس اللي خذات، حيت دازو بزاف ديال السنين، وزيد عليها أنه صعيب يثبثو واش كانت كذبات على المرض ديالها ولا لا.