الرئيسية > آش واقع > قضية “وكالين رمضان” ف “ستارباكس”.. مصدر مطلع على الملف كشف لـ” كود” تفاصيل جديدة: 6 اللي متابعين وكلهم دوزو 24 ساعة حراسة نظرية.. وأغلبيتهم عندهم عذر للإفطار وكاين اللي ماكلاش
12/05/2021 14:30 آش واقع

قضية “وكالين رمضان” ف “ستارباكس”.. مصدر مطلع على الملف كشف لـ” كود” تفاصيل جديدة: 6 اللي متابعين وكلهم دوزو 24 ساعة حراسة نظرية.. وأغلبيتهم عندهم عذر للإفطار وكاين اللي ماكلاش

قضية “وكالين رمضان” ف “ستارباكس”.. مصدر مطلع على الملف كشف لـ” كود” تفاصيل جديدة: 6 اللي متابعين وكلهم دوزو 24 ساعة حراسة نظرية.. وأغلبيتهم عندهم عذر للإفطار وكاين اللي ماكلاش

عفراء علوي محمدي- كود//

كشف مصدر مطلع على ملف الشباب اللي كلاو رمضان “فستارباكس زينيث” فكازا فاواخر أبريل اللي فات، أن عدد المتابعين تحديدا فهذ الملف هو ستة ديال الأشخاص، وكشف انهم كاملين دوزو 24 ساعة حراسة نظرية.

وزاد المصدر، فحديثو ل”كود”، أن كلشي بدا من بعد ما شاف شي واحد يدعى “دريس”، وهو مطلق خدام فبوركَون، (شاف) واحد كيكمي كَارو من زاج ديال “ستارباكَص”، فدخل باش يتحرى الأمر، فإذا به كيتفاجأ بمجموعة ناس كلهم واكلين رمضان.

وحسب المحضر دالملف اللي اطلع عليه مصدرنا، فالمشتكي هضر مع المسؤولين ديال القهوة على هذشي، ومنين ماسمعوش ليه جاب البوليس.

ومصدر “كود”، المعارض للقانون 222 اللي كيجرم الإفطار العلني، تساءل كيفاش للبعض مايدخلوش سوق راسو، فالوقت اللي البوليس براسهم والدولة مميكين على الناس اللي ماكيصوموش، إلا إلى كانت شكاية من هذ القبيل.

لكن من جهة خرى، تساءل المصدر المطلع على الداعي من الحراسة النظرية فهذ الحالة، فالوقت اللي الغاية من الحراسة النظرية هي ضبط المعني بالأمر باش مايتلفش او يخبي او يتلاعب بوسائل الإثبات، أو لأنه كيشكل خطورة ما، “وهنا ماكاينش داعي لذلك، خصوصا وأن بعضهم كَاع كان عندو عذر، فعلاش غيدوز 24 ساعة؟”، كيقول المصدر.

وتساءل مصدرنا كذلك علاش ماتمش متابعة العاملين ف”ستارباكَص” بتهمة المشاركة فالجريمة، أو عدم التبليغ عنها، وشاف أن فهذشي كيل بمكيالين، وحكَرة على المواطن المغربي، فالوقت اللي مايقدوش يتابعو شركة دولية بتهم بحال هذي، حيت هذشي غيجبد لبهم صداع كبير.

وقال أن بعض الأشخاص المتابعين أكدو كَاع انهم مراض ومايقدوش على الصيام، ومنهم واحد طالب، ودخل للقهوة غير باش يقرى، وكونسوما قرعة دالما وبقات قدامة مسدودة، ومع ذلك تاهو مشى فيها.

موضوعات أخرى

18/06/2021 20:00

 لمغاربة مشاو عند اليمين المتطرف الطالياني باش يرد على اليمين المتطرف الصبليوني. سالفيني كيشكر فمجهودات المغرب لمحاربة الهجرة 

18/06/2021 18:20

انتخابات اللجان الإدارية فـ قطاع التربية الوطنية.. نسبة المشاركة فـ صفوف نساء ورجال التعليم وصلات لـ57 فالمية – أرقام