أسماء غربي – كود ////

تواصلات “كود” مع سعاد براهمة محامية الجمعية المغربية لحقوق الإنسان على متابعة طفلة قاصر عندها 15 عام فقضية اعتقال أفراد من عائلة هشام جريندو الهارب فكندا حقاش متورطين فجرائم كتعلق بالتهشير والابتزاز وعدد من التهم.

المحامية براهمة كالت لـ”كود” باللي الجمعية غادي تتابع هاد الملف لي عارفة عليه معلومات فقط دبا من خلال ما كيتم تداولو على مواقع التواصل الاجتماعي ومن خلال الفرع ديال الجمعية بمدينة تاهلة.

وعبرت المحامية فتصريحاتها لـ”كود” عن الرفض ديالها لإيداع هاد الطفلة بمركز حماية الطفولة، وضافت بلي الوضع السليم لهاد الطفلة هو تكون بين عائلتها وبلي التهم لي متابعة بها ماشي خطيرة.

ورجعات المحامية راهمة وكالت لـ”كود”باللي وخا أم الطفلة وبعض أفراد من عائلتها مشدودين فالحبس ممكن تتسلم لعمامها او شي حد آخر من عائلتها، مضيفة أن هادشي يؤكد أنه كاين تراجع ف المكتسبات لي تم تحقيقها ف مجال العدالة والإنصاف.

غادي نتابعو ف الجمعية هاد الملف وغادي نقدمو التوضيحات بعدما نشوفو الملف ونقراو الحيثيات كلها، والطفلة كيعطيها القانون أنها تتسلم لوالدها او عائلتها وتتقدم للمحاكمة فظروف تؤمن لها محاكمة عادلة.. كتقول المحامية براهمة لـ”كود”.

نائب وكيل الملك بالمحكمة الزجرية الابتدائية بعين السبع، جمال لحرور، كان أكد أنه جرى الوقوف، من خلال الأبحاث التقنية المنجزة من لدن الفرقة الوطنية للشرطة القضائية، على أن رقم النداء الذي استعمل في تهديد إحدى المشتكيات سبق أن تم تثبيته بهاتف القاصر.

وأشار المسؤول القضائي إلى أنه تم العثور على الحامل البلاستيكي والرقم الهاتفي موضوع البحث، بالإضافة إلى خمسة حاملات بلاستيكية لشرائح خاصة بأرقام نداء بغرفة نوم القاصر.