كود – كازا ///
قضية غريبة مطروحة على محكمة نانت في فرنسا والأطراف ديالها بجوج من نفس العائلة. خوت وخواتات المتوفى من المغرب وشريكتو السابقة وبناتو من فرنسا. هاذو شي باغيه يتدفن في المغرب وشي باغي يحرق الجثمان ديالو وينثر رمادو في البحر.
وقالت جريدة لوفيگارو نقلا عن ملحق (Presse Océan)، أن المتوفى (64 عام) اللي كان عايش في فرنسا من 1981 مات في 13 نونبر الحالي بلا ما يخلي رغبات محددة حول إجراءات الگنازة ديالو، وهاذ الشي تسبب في خلاف بين بناته وشريكته السابقة اللي باغين حق الجثمان وخوه وخواتاتو في المغرب اللي كيفضلو إعادة جثمانه إلى وطنه باش يتدفن بطريقة إسلامية..
المحكمة قرارات في نهاية المطاف أن “الشهادات اللي قدمها الطرفين معا ما كتعطيش دليل كافي على أن المتوفى كان باغي إعادة جثته إلى المغرب ودفنها أو أنه كان يعارض بشدة حرق الجثة ديالو”. واعتبرت المحكمة أن بناتو وشريكتو السابقة هما الطرف اللي عندو الصلاحية أكثر باش يحددو ترتيبات الگنازة.
