الرئيسية > آراء > قضية سعد لمجرد و لورا : المتهم بريء حتى تثبت إدانته ولكن هادشي مكايعنيش اننا عندنا الحق نبهدلو بالضحية المفترضة و نسبوها و نكدبوها
14/11/2017 10:30 آراء

قضية سعد لمجرد و لورا : المتهم بريء حتى تثبت إدانته ولكن هادشي مكايعنيش اننا عندنا الحق نبهدلو بالضحية المفترضة و نسبوها و نكدبوها

قضية سعد لمجرد و لورا  : المتهم بريء حتى تثبت إدانته ولكن هادشي مكايعنيش اننا عندنا الحق نبهدلو بالضحية المفترضة و نسبوها و نكدبوها

غيثة علام-كود

في أول ظهور لها, عاودات الفرنسية “لورا بريول” لي متاهمة “سعد لمجرد” بالاغتصاب ,الفيرسيون ديالها د شنو وقع في ليلة 26 أكتوبر من العام الماضي. رفقات الفيدييو بصور باين  فيهوم  آثار الضرب و العنف على الجسد ديالها, وختماتها بقولها أنها مغتقبلش الفلوس باش تتراجع على الشكاية ديالها و بلي هي في حاجة الى الدعم باش يدخل “لمجرد” للحبس حيت داكش لي كيستاحق.

ولكن معامن ؟! شكون هادو لي غادي يدعموك اختي لورا؟ الفيديو تلاحت فيوتوب, وترجمات للعربية و طبعا بوهبوش هجمو بالتعاليق ديالهوم المتخلفة, الجاهلة, المكلخة, الحمارية, المغبرة, المعفونة  (ضرب طليلة على التصاور المرفقة بالمقال). فاش قريت هاد التعاليق (لي كاتبينهوم عيالات و رجال على حد سواء,  حيت الكلاخ ديالنا ماشي جندري الحمد الله, و قايس جميع الطبقات الاجتماعية و الفئات السنية) كان علاين يجيني شلل نصفي, دماغي وقف و تخلطات لي البكية مع التقية, وتما فهمت جوج ديال الحجات, اللولة هي حنا شعب ميئوس من أمره, و ما فدين منا مايتجمع و مايتنقد,  و الثانية هي عندنا بنادم مور الشمش مفاهمش شنو هو الاغتصاب و فوقاش يمكلنا نعتابرو شي حادثة بأنها اعتداء ولا تحرش جنسي.

ختي, خويا, باش مانصعبش على دماغكوم الأحادي الخلية, المفهوم ديال الاغتصاب, بطريقة مبسطة, هو اي علاقة جنسية بين جوج ديال الناس (ولا كتر) مافيهاش الموافقة/ الرضى ديال الطرفين, يعني واحد باغي و الآخر لا. و لهذا الحالات التالية كاملة كتعتابر اغتصاب (ايييه كاملة):

  • تشد وحدة مكتعرفهاش و تمارس عليها الجنس صحة, واخا تكون لابسة معري ومتبرجة حيت اللباس المعري مكيعنيش “اجي نيكني”.
  • تمشي معاك وحدة للدار و من بعد تغير رأيها, واخا تكون باستك ولا كتر كاع, و واخا تكون شاربة, الا قالتلك “حبس مابقيتش باغية” و كملتي, راك حمار موغتاصب, حيت “لا” كتعني “لا”, ماشي زيد حاول, او راني باغية و كنمتل !
  • مرتك (ولا صاحبتك) مكانش راشقليها عليك ومابغاتش تمارس معاك “الحب”, لا فورصيتي راسك عليها كيتعتابرهداك اعتداء جنسي ! خلينا من الهرطقة ديال حق الزوج في الاستمتاع الجنسي فوق ما بغا, ولا واجب الزوجة نحو زجوها, المرا خاصها حتى هي تكون باغية.
  • واخيرا, تمارس الجنس على بنادمة مغيبة, فاقدة الوعي, سكرانة بيلة, مدروكية … حتى هو اغتصاب حيت بكل بساطة السيدة ماشي فالوعي ديالها باش ترفض ولا تدافع على راسها و لا تخلي دار بوك.

الفرق بينا وبين بلدان اخرى بحال ميريكان ولا فرانسا هو دوك الناس  منوضين قربالة على شنو واقع عندهوم من اتهامات بالتحرش و الاغتصاب, و مكيدافعوش على الفنانة غي حيت كيعجبوهوم و كيلومو الضحايا. حنا عندنا بوزبال متضامن مع “لمجرد” غي حيت فان ديالو, و حاسبو بحالا تربا هو و ياه , و كيحلف برا س مو مايديرها “المعلم” واخا السيد عندو سوابق ! و السيدة طبعا غي قحبة و باغية تشهر حيت هي لي مشات معاه للوطيل.

نعم, في أي مجتمع محترم كيكون المتهم بريء حتى تثبت إدانته ولكن هادشي مكايعنيش اننا عندنا الحق نبهدلو بالضحية المفترضة و نسبوها و نكدبوها.

موضوعات أخرى

25/09/2018 15:00

فيديو مشعل العافية في البوليس. خو اللي مات برصاصة من شرطي فمكناس دار لايف شبع فيه سبان في “المخزن” وتوعد فيه البوليس بالتصفية

25/09/2018 13:33

يخطب رئيس الدولة ولا ما يخطبش. ها شعار العنصر: بغيتو التجديد والشباب وسيرو قلبو عليه فشي حزب اخر راه الحركة ديالي وانا مولاها وخليكم من كلام الخطب الشي لاخر