كود كازا//

تم متابعة اليوتوبوز جميلة سعدان، الملقبة ب”أم بألف رجل”، فحالة اعتقال، بتهم “إهانة مؤسسات منظمة والقيام بتوزيع ادعاءات ووقائع كاذبة بهدف المساس بالحياة الخاصة للأشخاص والتشهير”، بينما ولدها متابع فحالة سراح بسباب التصوير.

هذ التهم توجهات لسعدان من طرف النيابة العامة،  بسباب فيديو حطاتو على قناتها فيوتوب، هضرات فيه على الدعارة المنتشرة فأكادير ومراكش، كيف كتقول.

ومن حب أمثال هذ السيدة لفلوس “الأدسنس”، وباش تجيب المشاهدات والتفاعلات، بدات تزيد فيخرات، وتقول حوايج خيالية، وجبدات الناس بسميتنم، وتهمتهم بممارسة القوادة، وتساءلات، باش تلعب على عاطفة المتلقين: “علاش كتشوفو الحقيقة ولسانكم عاجز؟ بعتو الغالي بالرخيص بقات فالتطبيق ماشي النخوى على الخوى”.

وقالت أن 8161 قواد، ومنهم اللي ذكراتهم بالأسماء، كيتراسو أكبر مشاريع الدعارة مشروع فالنخيل 1، و2، و3، وعاد فمجمعات فطرقان الصويرة وفاس وأمزميز طريق تمصلوحت وغيرها، وقالت واحد من هذو كان كيبيع جفيل غير فبداية الألفينات، ودابا دار الفيلات والطوموبيلات.

وكتدعي أن البنات اللي كيخدمو عند هذ الناس كيتكرفصو بالزاف، وكيخدمو 24 ساعة على 24، والخليجيين اللي كيجيو كينصبو عليهم، وكيكطو كَاع اللي عندهم إلى خسرو شي حاجة.

فاللخر ديال الفيديو، قلباتها سعدان سعاية وطليب ونواح، وقالت انها هي وولدها ناس دراوش، وولدها بطل كبير ومالقاش اللي يدعمو، كيف سالات الفيديو باستنكار الفلوس اللي كيدخلو هذ البنات، اللي قالت مكرفصات، وكيفاش كيديرو الديور باقل جهد وغير بالدعارة.

وكان ولد سعدان تشد معاها، وهو اللي مكلف ليها بالشين والصفحة والتصوير، قبل ما يخرج بكفالة مالية وتتم متابعتو فحالة سراح.

ولقات سعدان هي وولدها تعاطف كبير وتضامن من طرف نشطاء كثار على مواقع التواصل الاجتماعي.

من جهتها استنكرات حركة خميسة اعتقال سعدان، فالوقت اللي ماتفتحش تحقيق فالتصريحات اللي دلات بيهم السيدة فالفيديو.

وسعدان هي وولدها على موعد مع الجلسة الثانية من محاكتهما نهار 23 غشت الجاري.